SportsLink PK Latest Sports News in Urdu
اسلام آباد (سپورٹس لنک رپورٹ ) پاکستان فٹ بال فیڈریشن کی زیر نگرانی الیکشن 2022 کا آن لائن آغاز 5 اگست سے ہوگا۔ گذشتہ روز پاکستان فٹ بال فیڈریشن کے سیکرٹری جنرل محمد نوید اکرم نے بتایاکہ پہلا مرحلہ 5 سے 20 اگست تک مکمل کیا جائے گا۔ جس میں 2015 کی ووٹرلسٹ میں موجود صدر اور سیکرٹری کو بذریعہ پورٹیل ایس ایم ایس بھیجا جائے گا۔
تاکہ وہ اپنے کلب اور آفیشلز کی تصدیق کرے کہ وہ اس وقت برقرار ہیں یا اس میں کوئی تبدیلی کی گئی ہے۔ اسی ایس ایم ایس پر وہ تصدیق کرکے اپ ڈیٹ دے گا۔ اگر کلب آفیشلز (صدر و سیکرٹری) اور کلب میں کوئی تبدیلی واقع نہیں ہوئی ہے تو انہیں تجدید کلب کیلئے ایک فارم جاری کیا جائے گا جسے آن لائن فل کر کے جمع کروانا ہوگا۔
دوسرے مرحلے میں کلب آفیشلز اپنے کلب کے کھلاڑیوں کی رجسٹریشن کا عمل مکمل کرکے فیڈریشن کو مطلع کرے گا۔ تیسرے مرحلے میں کلبوں کی رجسٹریشن کی جانچ پڑتال کے بعد کلبوں کی فہرست جاری کی جائے گی۔ فیڈریشن کلبوں کی فزیکل اسکروٹنی کے بعد کلب کو ووٹر لسٹ میں شامل کرنے یا نہ کرنے کا حتمی فیصلہ کرے گی۔ انہوں نے کہا کہ پاکستان فٹ بال فیڈریشن کا فری، فیئر اور ٹرانسپیرنٹ الیکشن کی جانب یہ تاریخی اقدام ہے جس پر عمل پیرا ہوکر نہ صرف 2022 کے الیکشن کو شفاف اور منصفانہ بنانے میں مدد ملے گی، بلکہ مستقبل میں ہونے والے الیکشنز بھی متنازعہ ہونے کے بجائے سب کیلئے قابل قبول اور فروغ فٹ بال میں معاون اور مددگار ثابت ہونگے۔
