اے ایف سی کے وفد کی پی ایف ایف کے مختلف ڈیپارٹمنٹس کے سربراہان سے ملاقات

اے ایف سی کے 3رکنی وفد کی پاکستان فٹبال فیڈریشن میں مختلف شعبوں کے سربراہان سے ملاقات میں اہم معاملات پر غور کیا گیا۔

لاہور – 7 مئی 2024 ؛ (نوازگوھر)

پیر کو لاہور پہنچنے والے مہمان آفیشلز میں ہیڈ آف اسٹریٹجک پلاننگ و ایڈوائزری یونٹ لیزارس جانسن، سینئر منیجر ساؤتھ ایشیا یونٹ سونم جمی اور منیجر ساؤتھ ایشیا یونٹ دنیش ڈی سلوا شامل ہیں۔

دوسرے روز وفد کی پی ایف ایف نارملائزیشن کمیٹی کے چیئرمین ہارون ملک سے ملاقات ہوئی،این سی رکن شاہد نیاز کھوکھر اور مختلف ڈیپارٹمنٹس کے سربراہ بھی موجود تھے،

میٹنگ میں پاکستان فٹبال کی موجودہ صورتحال پر بات چیت ہوئی۔گزشتہ روز بھی وفد کی ملاقاتوں کا سلسلہ جاری رہا، مختلف شعبوں کے سربراہان نے گزشتہ 2 سال میں ہونے والے ایونٹس اور سرگرمیوں کی تفصیلات سے آگاہ کرنے کے ساتھ مستقبل کی منصوبوں اور اقدامات سے آگاہ کیا،

پاکستان فٹبال کے معاملات کو پیشہ ورانہ انداز میں چلانے کیلئے فیڈریشن کی گورننس، فنانس، پلاننگ، انتظامی امور پر بھی غور کیا گیا، انفرا اسٹرکچر کے معاملات کا بھی جائزہ لیا گیا

۔فریقین نے پاکستان فٹبال کے فروغ کے مواقع اور ممکنہ چیلنجز پر تفصیلی تبادلہ خیال کیا، اے ایف سی وفد کی سفارشات کی روشنی میں پاکستان فٹبال کے امور کو ترقی کی راہ پر گامزن کرنے میں مدد ملے گی، مہمان وفد کا 3روزہ دورہ کل (بدھ) کو مکمل ہوگا۔