مچل اسٹارک نے تاریخ رقم کردی، ٹیسٹ کرکٹ کے کامیاب ترین لیفٹ آرم بولر بن گئے
ڈارون ٹیسٹ میں مچل اسٹارک نے ایک ایسی وکٹ حاصل کی جس نے انہیں کرکٹ کی تاریخ میں منفرد مقام دلا دیا؛ شادمان اسلام کو آؤٹ کرتے ہی آسٹریلوی فاسٹ بولر نے رنگانا ہیراتھ کا ریکارڈ توڑ کر ٹیسٹ کرکٹ کے کامیاب ترین لیفٹ آرم بولر کا اعزاز اپنے نام کرلیا۔
آسٹریلیا کے تجربہ کار فاسٹ بولر مچل اسٹارک نے ٹیسٹ کرکٹ میں ایک اور بڑا سنگِ میل عبور کرتے ہوئے بائیں ہاتھ سے سب سے زیادہ وکٹیں لینے والے بولر بننے کا اعزاز حاصل کر لیا۔
انہوں نے یہ کارنامہ بنگلادیش کے خلاف ڈارون میں جاری پہلے ٹیسٹ میچ کے دوران انجام دیا۔ڈارون ٹیسٹ میں مچل اسٹارک نے بنگلادیشی اوپنر شادمان اسلام کو آؤٹ کرکے اپنی ٹیسٹ وکٹوں کی تعداد 434 تک پہنچا دی،
جس کے ساتھ ہی انہوں نے سری لنکا کے سابق اسپنر رنگانا ہیراتھ کا 433 وکٹوں کا ریکارڈ توڑ دیا۔36 سالہ مچل اسٹارک نے یہ تاریخی اعزاز اپنے 106ویں ٹیسٹ میچ میں حاصل کیا۔
434 وکٹوں کے ساتھ وہ ٹیسٹ کرکٹ میں مجموعی طور پر سب سے زیادہ وکٹیں لینے والے بولرز کی فہرست میں بھارت کے سابق کپتان کپل دیو کے ساتھ مشترکہ طور پر 11ویں نمبر پر بھی آ گئے ہیں۔
ٹیسٹ کرکٹ میں بائیں ہاتھ کے کامیاب ترین بولرز کی فہرست میں اب مچل اسٹارک پہلے، سری لنکا کے رنگانا ہیراتھ 433 وکٹوں کے ساتھ دوسرے جبکہ پاکستان کے لیجنڈ وسیم اکرم 414 وکٹوں کے ساتھ تیسرے نمبر پر موجود ہیں۔
مچل اسٹارک نے اکتوبر 2010 میں اپنے بین الاقوامی کیریئر کا آغاز کیا تھا اور اس کے بعد سے وہ آسٹریلیا کی ٹیسٹ، ون ڈے اور ٹی ٹوئنٹی ٹیموں کے اہم ترین بولرز میں شمار ہوتے ہیں۔
وہ آسٹریلیا کی ون ڈے ورلڈ کپ، ٹی ٹوئنٹی ورلڈ کپ اور ورلڈ ٹیسٹ چیمپئن شپ جیتنے والی ٹیموں کا بھی حصہ رہ چکے ہیں، جبکہ ون ڈے کرکٹ میں بھی وہ 130 میچز میں 247 وکٹیں اپنے نام کر چکے ہیں۔
434 ٹیسٹ وکٹوں کے ساتھ مچل اسٹارک نے ٹیسٹ کرکٹ کے کامیاب ترین لیفٹ آرم بولر کے طور پر اپنا نام تاریخ میں ہمیشہ کے لیے درج کرا دیا۔
