آئی سی سی کی نئی ٹیسٹ رینکنگ جاری، بابر اعظم کی 2 سال بعدٹاپ ٹین میں شاندار واپسی
انٹرنیشنل کرکٹ کونسل (آئی سی سی) نے ٹیسٹ کرکٹ کی نئی پلیئرز رینکنگ جاری کر دی ہے، جس میں پاکستان کے کپتان بابر اعظم، اوپنر عبداللہ شفیق اور اسپنر ساجد خان نے نمایاں ترقی حاصل کی ہے۔
ویسٹ انڈیز کے خلاف حالیہ ٹیسٹ سیریز میں شاندار کارکردگی کے بعد پاکستانی کھلاڑیوں کی رینکنگ میں واضح بہتری دیکھنے میں آئی ہے۔آئی سی سی کی تازہ ٹیسٹ بیٹنگ رینکنگ کے مطابق آسٹریلیا کے ٹریوس ہیڈ پہلے، انگلینڈ کے ہیری بروک دوسرے اور جو روٹ تیسرے نمبر پر برقرار ہیں۔
پاکستان کے کپتان بابر اعظم نے پانچ درجے ترقی کرتے ہوئے دوبارہ ٹاپ ٹین میں جگہ بنا لی ہے اور اب وہ دسویں نمبر پر پہنچ گئے ہیں۔ بابر تقریباً دو سال بعد ٹیسٹ بیٹرز کی ٹاپ ٹین رینکنگ میں واپس آئے ہیں۔
انہیں یہ کامیابی ویسٹ انڈیز کے خلاف دوسرے ٹیسٹ میں پہلی اننگز کے 88 رنز اور دوسری اننگز میں ناقابل شکست 24 رنز کی بدولت ملی۔دوسری جانب عبداللہ شفیق نے شاندار کارکردگی کے بعد رینکنگ میں 25 درجے کی بڑی چھلانگ لگاتے ہوئے 32ویں پوزیشن حاصل کر لی۔
ویسٹ انڈیز کے خلاف دوسرے ٹیسٹ کی پہلی اننگز میں ان کی ناقابل شکست 160 رنز کی میچ وننگ اننگز نے انہیں پلیئر آف دی میچ بھی بنایا۔
پاکستان کے دیگر بیٹرز میں سعود شکیل دو درجے تنزلی کے بعد 26ویں، محمد رضوان ایک درجے تنزلی کے ساتھ 27ویں، سلمان علی آغا چھ درجے تنزلی کے بعد 38ویں جبکہ شان مسعود تین درجے تنزلی کے بعد 39ویں نمبر پر آ گئے ہیں۔
بولرز کی رینکنگ میں بھارت کے جسپریت بمراہ بدستور پہلے، نیوزی لینڈ کے میٹ ہینری دوسرے اور آسٹریلیا کے مچل اسٹارک تیسرے نمبر پر موجود ہیں۔
پاکستان کے ساجد خان نے پانچ درجے ترقی کرتے ہوئے 30ویں پوزیشن حاصل کر لی، جبکہ شاہین شاہ آفریدی 28ویں نمبر پر برقرار ہیں۔ خرم شہزاد بھی ایک درجہ بہتری کے ساتھ 51ویں نمبر پر پہنچ گئے ہیں۔
آئی سی سی کی ٹیسٹ آل راؤنڈر رینکنگ میں بھارت کے رویندرا جڈیجا بدستور سرفہرست ہیں، جبکہ ساجد خان نے اس فہرست میں بھی پانچ درجے ترقی کرتے ہوئے 32ویں پوزیشن حاصل کر لی۔
دوسری جانب ون ڈے رینکنگ میں افغانستان کے اوپنر رحمان اللہ گرباز تین درجے ترقی کے بعد 11ویں نمبر پر پہنچ گئے ہیں، جبکہ حشمت اللہ شاہدی بھی چار درجے بہتری کے ساتھ ٹاپ 50 میں شامل ہو گئے۔
بولرز کی فہرست میں افغانستان کے کپتان راشد خان نے اپنی پہلی پوزیشن مزید مستحکم کر لی، جبکہ آئرلینڈ کے مارک ایڈائر 17ویں نمبر پر آ گئے ہیں۔
ویسٹ انڈیز کے خلاف کامیاب ٹیسٹ سیریز کے بعد آئی سی سی کی نئی رینکنگ نے پاکستانی کھلاڑیوں کی عمدہ کارکردگی پر مہر ثبت کر دی، جبکہ بابر اعظم کی ٹاپ ٹین میں واپسی اور عبداللہ شفیق کی بڑی چھلانگ قومی ٹیم کے لیے حوصلہ افزا خبر ثابت ہوئی۔
