تیسری استاد گل محمد بلوچ میموریل انٹر ڈسٹرکٹ باکسنگ چیمپئن شپ کا کامیاب انعقاد
حیدرآباد نے مینز اور میرپورخاص نے ویمنز ونر ٹرافیاں اپنے نام کر لیں،
ملک ذوالفقار علی روشن کی بطور مہمان خصوصی شرکت
میرپورخاص (سپورٹس لنک رپورٹ) تیسری استاد گل محمد بلوچ میموریل انٹر ڈسٹرکٹ باکسنگ چیمپئن شپ” شہید محترمہ بے نظیر بھٹو (گاما اسٹیڈیم) میں سندھ باکسنگ ایسوسی ایشن اور ڈسٹرکٹ اسپورٹس آفیسر میرپورخاص کے تعاون سے منعقد ہوئی جس میں حیدرآباد اور میرپورخاص کی باکسنگ ٹیموں نے بھرپور شرکت کی۔
نتائج کے مطابق، مردوں کے مقابلوں میں حیدرآباد کی ٹیم نے ونر ٹرافی حاصل کی، جبکہ میرپورخاص کی ٹیم رنر اپ رہی۔ دوسری جانب، خواتین کے مقابلوں میں میرپورخاص کی باکسرز نے شاندار کارکردگی دکھاتے ہوئے ونر ٹرافی اپنے نام کی،
حیدرآباد کی ٹیم دوسرے نمبر پر رہی۔ بعد ازاں رنگا رنگ اختتامی تقریب میں مہمانِ خصوصی پاکستان پیپلز پارٹی ڈسٹرکٹ سانگھڑ کے مرکزی رہنما ملک ذوالفقار علی روشن نے انعامات تقسیم کیے۔
مہمانِ خصوصی نے اپنے خطاب میں کہا کہ اس طرح کے پروگرام نوجوانوں کو مثبت سرگرمیوں کی جانب راغب کرنے میں اہم کردار ادا کرتے ہیں۔ تفصیلی نتائج کے مطابق مختلف کیٹیگریز میں درج ذیل کھلاڑی فاتح قرار پائے۔
جونیئر کلاس: عبدالرحمٰن مغل، سفیر احمد، محمد عامر، ذیشان اور امیر حمزہ (میرپورخاص) نے اپنے اپنے مقابلوں میں کامیابی حاصل کی۔
بوائز کلاس: کاشف (حیدرآباد)، معاذ خان (میرپورخاص)، کبیر (حیدرآباد) اور حمزہ (میرپورخاص) فاتح رہے۔ یوتھ کلاس (مرد): عبدالحفیظ (میرپورخاص)، علی حسن (حیدرآباد)، کبیر (میرپورخاص) اور زین (میرپورخاص) نے حریفوں کو شکست دی۔
یوتھ کلاس (خواتین): ایمان پٹھان، زبل، لبنیٰ، سونیا، زینب اور عائزہ پٹھان (تمام میرپورخاص) نے اپنے مقابلوں میں بہترین کارکردگی کا مظاہرہ کرتے ہوئے جیت اپنے نام کی۔
تقریب کے اختتام پر ڈسٹرکٹ باکسنگ ایسوسی ایشن کے سیکریٹری محمد سلیم بلوچ نے تمام مہمانوں اور شرکاء کا شکریہ ادا کیا۔ اس موقع پر ڈسٹرکٹ اسپورٹس آفیسر، آرگنائزنگ سیکریٹری محمد سلیم بلوچ، بشیر بلوچ، اور دیگر معززین بھی موجود تھے۔
