جنوبی افریقہ کیخلاف پہلے ٹیسٹ سے قبل قومی ٹیم کیلئے بری خبر

سینجورین (سپورٹس لنک رپورٹ)پاکستان کرکٹ بورڈ(پی سی بی) نے جنوبی افریقہ کے خلاف پہلے ٹیسٹ میچ سے قبل فاسٹ باؤلر محمد عباس اور لیگ اسپنر شاداب خان کی انجری کی تصدیق کردی۔محمد عباس نیوزی لینڈ کے خلاف ٹیسٹ سیریز میں انجری کا شکار ہوئے تھے لیکن سلیکشن کمیٹی اور ٹیم مینجمنٹ نے انہیں فٹ قرار دے کر دورہ جنوبی افریقہ کے لیے اسکواڈ کا حصہ بنا لیا۔لیکن جنوبی افریقہ کے خلاف پہلے ٹیسٹ میچ سے قبل ٹور میچ میں فاسٹ باؤلر نہ کھلانے سے شکوک و شبہات نے جنم لیا اور عباس کے ساتھ ساتھ لیگ اسپنر شاداب خان کی انجری کی بھی اطلاعات سامنے آنے لگیں۔سلیکشن کمیٹی اور ٹیم مینجمنٹ نے انجری کے حوالے سے اطالاعات کو افواہ قراردیا لیکن اب پی سی بی نے دونوں کھلاڑیوں کی انجری کی تصدیق کردی ہے۔بورڈ کی جانب سے جاری اعلامیے میں کہا گیا ہے کہ شاداب خان اور محمد عباس کی انجری کا جائزہ لینے کے بعد پاکستان ٹیم مینجمنٹ نے اس بات پر اتفاق کیا ہے کہ یہ دونوں جنوبی افریقہ کے خلاف 26جنوری سے شروع ہونے والے ٹیسٹ میچ کے لیے فٹ نہیں ہیں۔پی سی بی کے مطابق عباس اور شاداب بہتری کی جانب گامزن ہیں اور دونوں کی انجری میں بہتری آ رہی ہے۔پی سی بی نے امید ظاہر کی کہ دونوں کھلاڑی تین جنوری سے کیپ ٹاؤن میں شروع ہونے والے ٹیسٹ میچ سے قبل فٹ ہو جائیں گے اور سلیکشن کے لیے دستیاب ہوں گے۔