زمبابوے سے سیریزکیلئے انگلش تجربے سے فائدہ اٹھائیں گے‘ وسیم خان

بائیو سیکیور ماحول یقینی بنائیں گے،نومبر میں میچز سے قبل قرنطینہ کرنا ہوگا‘ چیف ایگزیکٹیو آفیسر پی سی بی

لاہور(سپورٹس لنک رپورٹ)زمبابوے سے سیریز میں پاکستان انگلش تجربے سے فائدہ اٹھائے گا جب کہ بائیو سیکیور ماحول یقینی بناتے ہوئے پی سی بی اکتوبر میں میزبانی کیلئے پرامید ہے۔ برٹش ایشین ٹرسٹ کے سیمینار میں وسیم خان نے بتایا کہ مجوزہ شیڈول کے مطابق 3 ٹی ٹونٹی اور اتنے ہی ایک روزہ میچز کیلئے زمبابوے کی ٹیم اکتوبر کے وسط میں پاکستان پہنچے گی، ٹور نومبر میں شیڈول تھا مگر 14 روزہ قرنطینہ کے پیش نظر مہمان کرکٹرز کو قبل از وقت بلایا جائیگا،

سیریز کا آغاز نومبر کے پہلے ہفتے میں کرینگے، ہم پر امید ہیں کہ زمبابوین ٹیم پاکستان کے میدانوں کی رونقیں بڑھائے گی۔چیف ایگزیکٹیو نے کہا کہ پی سی بی اس کے ساتھ ڈومیسٹک کرکٹ شروع کرانے کی بھی تیاری کر رہا ہے، زمبابوے سے سیریز اور ملکی سطح کے مقابلوں میں بائیو سیکیور ماحول یقینی بنانے کیلئے انگلینڈ کے کامیاب تجربے سے فائدہ اٹھائیں گے۔یاد رہے کہ زمبابوین بورڈ دورۂ پاکستان کیلئے اپنی حکومت کی جانب سے اجازت کا منتظر ہے۔وسیم خان نے کہا کہ ہم پی ایس ایل 5 کے باقی میچز رواں سال ہی کرانے کیلئے پرعزم اور3 روزہ ونڈو تلاش کر رہے ہیں۔

انھوں نے پاکستان میں سیکیورٹی کے حوالے سے مفروضوں کو غلط قرار دیتے ہوئے کہا کہ حالات بہت بہتر ہو چکے، رواں سال پی ایس ایل کے دوران 37 غیر ملکی کرکٹرز مختلف ٹیموں میں شامل تھے،میں دنیا سے کہوں گا کہ کھلاڑیوں سے پوچھیں کہ ان کا پاکستان میں قیام کا تجربہ کیسا رہا۔ چیف ایگزیکٹیو نے کہا کہ کورونا وائرس کی وجہ سے سب کچھ رکا ہوا تھا، ایسے میں کرکٹ کی واپسی بھی اہم تھی،انگلینڈ ٹیم بھیجنا آسان فیصلہ نہ تھا، جب 10 پلیئرز کے ٹیسٹ مثبت آئے اس کے بعد کافی دباو? بھی تھا، بہرحال فیصلہ درست ثابت ہوا، ہم خوش ہیں کہ انٹرنیشنل کرکٹ کی بحالی کے عمل میں اپنا کردار ادا کیا۔