اج ٹی وی نے سجاس بلوز کو چار وکٹوں سے شکست دیکر ایس ایس بی سجاس ٹی ٹوئنٹی کپ کے سیمی فائنل تک رسائی حاصل کرلی

کراچی (اسپورٹس رپورٹر)اج ٹی وی نے سجاس بلوز کو چار وکٹوں سے شکست دیکر ایس ایس بی سجاس ٹی ٹوئنٹی کپ کے سیمی فائنل تک رسائی حاصل کرلی۔ اسپورٹس جرنلسٹس ایسوسی ایشن سندھ کے تحت ایسٹرن اسٹار کرکٹ گراونڈ میں جاری ٹورنامنٹ کے تیسرے میچ میں سجاس بلوز نے ٹاس جیت کر پہلے بیٹنگ کرتے ہوئے انیس الرحمن کے 35 رنز کی مدد سے 19.3 اوور میں 108 رنز کا ہدف دیا۔

انیس الرحمن کے علاوہ سجاس بلوز کا کوئی بھی بیٹسمین آج ٹی وی کے بولرز کا سامنا نہیں کرسکا۔ فاتح ٹیم کے صباحت علی 3 وکٹیں حاصل کرنے میں کامیاب رہے۔ جواب میں آج ٹی وی نے مطلوبہ ہدف پندرہویں اوور میں چھ وکٹوں کے نقصان پر حاصل کرلیا۔ آج ٹی وی کے وسیم قاسم نے 25 گیندوں پر 37 رنز بناکر جیت میں اہم کردار ادا کیا۔ تاہم فاتح ٹیم کے صباحت علی 19 رنز کے عوض تین وکٹیں لیکر میچ کے بہترین کھلاڑی قرار پائے۔۔ ٹورنامنٹ میں آج اے آر وائی ویب اور سچ ٹی وی آمنے سامنے ہونگے۔