لاہور ٹیسٹ،پیٹ کمنز اور سٹارک نے پاکستانی بیٹنگ لائن تباہ کر ڈالی،4بلے باز صفر پر آئوٹ

لاہور ٹیسٹ کے تیسرے دن کا کھیل ختم ہوگیا، جہاں پاکستانی بلے باز آسٹریلوی برتری ختم نہ کرسکے، قومی ٹیم کی بیٹنگ لائن کولیپس کرگئی، ٹیم 268 رنز بنا کر آل آؤٹ ہوگئی۔آسٹریلیا کی ٹیم نے دوسری اننگز میں بغیر کسی نقصان کے 11 رنز بنالیے ہیں جبکہ اسے 134 رنز کی مجموعی برتری بھی حاصل ہے۔

قذافی اسٹیڈیم میں کھیلے جارہے اس میچ میں جہاں ایک موقع پر قومی ٹیم کی پوزیشن بہتر دکھائی دے رہی تھی، وہاں وہ اچانک 54 رنز میں 8 وکٹیں گنوا بیٹھی۔پاکستان کی جانب سے پہلے سیشن کی عمدہ بیٹنگ کے بعد آسٹریلوی بولرز نے دوسرے سیشن کے شروع ہوتے ہی عبداللّٰہ شفیق کی قیمتی وکٹ حاصل کی، وہ 81 رنز بنا کر آؤٹ ہوئے۔

چائے کے وقفے سے قبل قومی ٹیم کو سیٹ اظہر علی کی وکٹ کا نقصان بھی اٹھانا پڑا، ان کو کپتان پیٹ کمنز نے اپنی ہی بال پر کیچ کیا۔میچ میں پاکستان کی چوتھی وکٹ فواد عالم کی گری، وہ 13 رنز بنا کر بولڈ ہوئے۔فواد عالم کے آؤٹ ہوتے ہی یکے بعد دیگر قومی بیٹرز اپنی وکٹیں گنواتے رہے۔

نعمان علی، شاہین شاہ آفریدی، حسن علی اور نسیم شاہ تو اپنا کھاتہ بھی نہ کھول سکے جبکہ ساجد خان نے 6 اور محمد رضوان نے ایک رن بنایا۔عبداللہ شفیق اور اظہر علی کے بعد کپتان بابر اعظم نے 67 رنز کے ساتھ حریف ٹیم کا مقابلہ کیا۔آسٹریلوی فاسٹ بولنگ قومی بیٹرز پر قہر بن کر برسی جہاں کپتان پیٹ کمنز نے 5 اور مچل اسٹار نے 4 وکٹیں لیں، جبکہ نیتھن لیون بھی ایک وکٹ لینے میں کامیاب رہے۔