SportsLink PK Latest Sports News in Urdu
پاکستان سپر لیگ (پی ایس ایل) سیزن 9 کے چھٹے میچ میں کراچی کنگز نے پشاور زلمی کو 7 وکٹوں سے شکست دے دی۔
لاہور کے قذافی سٹیڈیم میں پہلے کھیلتے ہوئے پشاور زلمی نے کراچی کنگز کو مقررہ 20 اوورز میں جیت کیلئے 155 رنز کا ہدف دیا، کراچی کنگز نے 17 ویں اوور میں 3 وکٹوں کے نقصان پر ہدف حاصل کرلیا۔
کراچی کنگز کی جانب سے کیرون پولارڈ نے 21 گیندوں پر 49 رنز کی طوفانی اننگز کھیلی اور ناٹ آؤٹ رہے، ان کی اننگ میں 4 چھکے اور 4 چوکے شامل تھے جبکہ جیمز وینس 38 رنز کے ساتھ نمایاں رہے۔
دیگر کھلاڑیوں میں شعیب ملک نے 29، محمد اخلاق نے 24 اور کپتان شان مسعود نے 12 رنز کھاتے میں ڈالے، پشاور زلمی کی جانب سے لیوک ووڈ نے 2 اور وقار سلام خیل نے ایک کھلاڑی کو پویلین بھیجا۔
قبل ازیں پہلے کھیلتے ہوئے پشاور زلمی کی پوری ٹیم 154 رنز پر پویلین لوٹ گئی، زلمی کے کپتان بابراعظم نے 72 رنز کی جارحانہ اننگ کھیلی لیکن رائیگاں گئی، دیگر کھلاڑیوں میں روومین پاول نے 39 اور آصف علی نے 23 رنز سکور کیے جبکہ 4 کھلاڑی ڈبل فگر میں داخل نہ ہو سکے۔
پشاور زلمی کی جانب سے محمد حارث 6، ٹام کوہلر 2، عامر جمال 1، اور لیوک ووڈ 8 رنز ہی بنا پائے جبکہ صائم ایوب، محمد ذیشان اور وقار سلام خیل بغیر کھاتہ کھولے ہی پویلین لوٹ گئے۔
کراچی کنگز کی طرف سے میر حمزہ اور حسن علی نے 3،3، ڈینیئل سیمز نے 2 جبکہ محمد نواز اور شعیب ملک نے ایک، ایک کھلاڑی کو پویلین کی راہ دکھائی۔
کراچی کنگز کو ملتان سلطانز کے خلاف پہلے میچ میں شکست کا سامنا کرنا پڑا تھا جبکہ پشاور زلمی بھی کوئٹہ گلیڈی ایٹرز کیخلاف کامیاب نہیں ہوپائی تھی۔
پی ایس ایل 9 کے پوائنٹس ٹیبل پر کنگز اس وقت چھٹے جبکہ زلمی پانچویں نمبر پر موجود ہے۔ ٹیبل پر ملتان سلطانز اس وقت اپنے دونوں میچز جیتنے کے بعد سرِفہرست ہے۔
پشاور زلمی کی پلئینگ الیون ; اس میچ کے لیے پشاور زلمی کی ٹیم میں صائم ایوب، بابر اعظم (کپتان)، محمد حارث (وکٹ کیپر)، ٹام کوہلر کیڈ مور، روومین پاول، آصف علی، عامر جمال، لیوک وُڈ، محمد ذیشان، وقار سلام خیل اور سلمان ارشاد شامل تھے۔
کراچی کنگز کی پلئینگ الیون ; اس میچ کے لیے کراچی کنگز کی ٹیم میں شان مسعود (کپتان)، محمد اخلاق (وکٹ کیپر)، جیمز وِنس، شعیب ملک، کیرون پولارڈ، محمد نواز، محمد عرفان خان، ڈینیئل سیمز، حسن علی، تبریز شمسی اور میر حمزہ شامل تھے۔