آئی ایم سی اوور 40 ٹی ٹوئنٹی کرکٹ ورلڈ کپ کی نئی تاریخوں کا اعلان
کراچی، 7 اگست، 2025: آئی ایم سی اوورفورٹی ٹی ٹوئنٹی کرکٹ ورلڈ کپ کی تاریخوں میں تبدیلی کر دی گئی ہے۔ یہ ٹورنامنٹ اب رواں برس اکیس نومبر سے یکم دسمبر تک کراچی میں منعقد ہوگا، جبکہ اس سے قبل اس کا انعقاد یکم سے تیرہ دسمبر 2025 تک طے کیا گیا تھا۔
پاکستان ویٹرنز کرکٹ ایسوسی ایشن (پی وی سی اے) کے چیئرمین فواد اعجاز خان کے مطابق یہ فیصلہ نیشنل گیمز کے باعث کیا گیا ہے، جو حکومت سندھ کے زیر اہتمام چھ سے تیرہ دسمبر 2025 تک کراچی کے مختلف مقامات پر منعقد ہوں گے۔
نیشنل گیمز میں سات ہزار سے زائد کھلاڑی، آفیشلز اور ٹیکنیکل اسٹاف شرکت کریں گے۔ چیئرمین پی وی سی اے نے کہا کہ ہمارا ٹورنامنٹ ابتدائی طور پر یکم سے تیرہ دسمبر تک شیڈول تھا،
مگر ایک ہی وقت میں دو بڑے ایونٹس کے انعقاد سے حکومت سندھ کو سیکیورٹی اور لاجسٹک کے حوالے سے شدید مشکلات کا سامنا ہو سکتا تھا۔
اس تصادم سے بچنے اور وزیراعلیٰ سندھ سید مراد علی شاہ کی خواہش، جنہوں نے نیشنل گیمز کی خود نگرانی لی ہے، اور پاکستان کرکٹ بورڈ کے مشورے پر ہم نے ٹورنامنٹ کی تاریخوں میں تبدیلی کا فیصلہ کیا۔
واضح رہے کہ ورلڈ کپ کی تفصیلات ایک اہم اجلاس میں طے کی گئیں، جو حال ہی میں چیئرمین (پی وی سی اے) فواد اعجاز خان، وزیر کھیل و امورِ نوجوانان سردار محمد بخش خان مہر، اور سیکریٹری اسپورٹس سندھ منور علی مہیسر کے درمیان وزیر کے دفتر میں منعقد ہوا۔
فواد اعجاز نے کہا کہ ہم نے تمام بارہ شریک ممالک جن میں پاکستان، آسٹریلیا، جنوبی افریقہ، ویسٹ انڈیز، سری لنکا، ہانگ کانگ، زمبابوے، کینیڈا، سعودی عرب، یو اے ای، امریکہ اور ریسٹ آف دی ورلڈ ٹیم شامل ہیں،
ان کو اعتماد میں لے لیا ہے۔ ہم تمام ٹیموں کے تعاون اور ہماری درخواست کو قبول کرنے پر ان کے بے حد شکر گزار ہیں۔ٹورنامنٹ کے دوران کل 42 میچز مختلف میدانوں پر کراچی میں کھیلے جائیں گے۔
پاکستان ٹیم کے تمام میچز فلڈ لائٹس میں ہوں گے اور یہ میچز براہ راست نشر کیے جائیں گے اور ڈیجیٹل پلیٹ فارمز پر بھی اسٹریم ہوں گے۔
پی وی سی اے کے سربراہ نے مزید کہا کہ نیا شیڈول کھیلوں کے شائقین کو زبردست کرکٹ سے لطف اندوز کرے گا، کھیلوں کی سیاحت کو فروغ دے گا اور پاکستان کی مہمان نوازی کو دنیا کے سامنے اجاگر کرے گا۔
