ایشین یوتھ گیمز کیلئے 53 رکنی پاکستانی دستے کی منظوری

پاکستان کا 53 رکنی میرٹ پر مبنی دستہ بحرین میں تیسری ایشیائی یوتھ گیمز میں شرکت کرے گا

وزیراعظم یوتھ پروگرام کے سربراہ رانا مشہود احمد چیف ڈی مشن ہوں گے

اسلام آباد، 4 اکتوبر 2025ء – پاکستان اسپورٹس بورڈ (پی ایس بی) نے بحرین میں 22 سے 31 اکتوبر 2025ء تک ہونے والی تیسری ایشیائی یوتھ گیمز میں 53 رکنی پاکستانی دستے کی شرکت کی باضابطہ منظوری دے دی ہے۔

یہ منظوری وزارت بین الصوبائی رابطہ (آئی پی سی) اور وزارت خارجہ کی کلیئرنس کے بعد دی گئی ہے، تاہم اس کی حتمی اجازت وزارت داخلہ کی منظوری سے مشروط ہوگی۔

یہ دستہ باصلاحیت کھلاڑیوں اور تجربہ کار آفیشلز پر مشتمل ہے جو ملک کی نمائندگی آٹھ مختلف کھیلوں میں کریں گے جن میں ایتھلیٹکس، بیڈمنٹن، جوجتسو، کبڈی، سوئمنگ، تائیکوانڈو، والی بال اور ریسلنگ شامل ہیں۔ وزیراعظم یوتھ پروگرام کے چیئرمین رانا مشہود احمد خان وفد کی قیادت بطور چیف ڈی مشن کریں گے۔

قومی کھیلوں کی شفافیت اور وقار کو برقرار رکھنے کے لیے پی ایس بی نے اس بار سختی سے میرٹ پر مبنی پالیسی اپنائی ہے۔ پی ایس بی کے ڈائریکٹر جنرل یاسر پیرزادہ کی جانب سے متعارف کرائی گئی

اس پالیسی کے تحت سیلف اسپانسرشپ کی حوصلہ شکنی کی گئی ہے، جو ماضی میں بااثر افراد کے ذریعے میرٹ سے ہٹ کر بیرونی دورے کرنے کے لیے استعمال ہوتی رہی۔

پی ایس بی کے ترجمان نے کہا ہے کہ:
“یہ دستہ ہمارے ملک کے خالص اسپورٹنگ ٹیلنٹ کی نمائندگی کرتا ہے۔ ڈی جی پی ایس بی کی واضح ہدایات کے تحت یہ یقینی بنایا گیا ہے کہ ہر کھلاڑی اپنی مہارت اور کارکردگی کی بنیاد پر منتخب ہو، نہ کہ مراعات یا ذاتی وسائل کی بنیاد پر۔ کھیلوں کو غیر ضروری بیرونی دوروں کا ذریعہ بنانے کا دور ختم ہو چکا ہے۔ اب ہماری توجہ صرف ان کھلاڑیوں پر ہے جو پاکستان کے لیے اعزاز جیتنے کی صلاحیت رکھتے ہیں۔”