پاکستان آئی ایم سی اوور فورٹی ٹی ٹوئنٹی ورلڈ کپ کی ٹرافی اٹھانے کے لئے تیار
فائنل میں اسٹار آل راؤنڈر بوم بوم شاہد آفریدی بھی ایکشن میں نظر آئینگے
پاکستان آئی ایم سی اوور فورٹی ٹی ٹوئنٹی ورلڈ کپ کی ٹرافی اٹھانے کے لئے تیار۔۔۔
گرین شرٹس نے دوسرے سمی فائنل میں ہمایوں فرحت اور عبد الرزاق کی جارحانہ بلے بازی کے باعث امریکہ کو 9 وکٹوں سے شکست دیکر فائنل میں رسائی حاصل کرلی۔۔
پہلے سمی فائنل میں آسٹریلیا نے ساؤتھ افریقہ کو پانچ وکٹوں سے شکست دیکر گھر واپسی کا پروانہ تھما دیا۔۔
پیر کو فائنل میں ایونٹ کی ناقابل شکست ٹیم پاکستان کا مقابلہ آسٹریلیا سے ہوگا۔۔۔۔
فائنل میں اسٹار آل راؤنڈر بوم بوم شاہد آفریدی بھی ایکشن میں نظر آئینگے
کراچی(سپورٹس لنک رپورٹ) نیشنل اسٹیڈیم کراچی میں کھیلے جانے والے آئی ایم سی اوور فورٹی ٹی ٹوئنٹی ورلڈ کپ کے سمی فائنل میں پاکستان نے امریکہ کو بآسانی 9 وکٹوں سے شکست دیکر فائنل کی دوڑ سے باہر کردیا۔
گرین شرٹس نے 153 رنز کا ہدف ایک وکٹ کے نقصان پر دسویں اوور کی پانچویں گیند پر حاصل کرلیا، پاکستانی اوپنرز کپتان عبد الرزاق اور ہمایوں فرحت نے شاندار آغاز فراہم کیا، دونوں بیٹرز نے اوپننگ شراکت میں 144 رنز بنائے،
ہمایوں فرحت نویں اوور کی آخری گیند پر 35 بالز پر 95 رنز بناکر رفیع ہاشمی کی گیند پر ایل بی ڈبلیو ہوگئے، ان کی اننگز میں 13 چوکے اور 6 بلند وبالا چھکے شامل تھے، کپتان عبد الرزاق 29 گیندوں پر پانچ چوکوں اور پانچ چھکوں کی مدد سے 58 رنز پر ناٹ آؤٹ رہے۔
اس سے قبل امریکہ نے پہلے بیٹنگ کرتے ہوئے کپتان محمد فرخ کے 59 رنز کی مدد سے 6 وکٹ 152 رنز بنائے، فاتح ٹیم کے ہمایوں فرحت میچ کے بہترین کھلاڑی، 27 رنز کے عوض دو وکٹیں حاصل کرکے تابش خان میچ کے بہترین بولر قرار پائے،
فاتح ٹیم کے دوسرے کامیاب تین بولر 31 رنز کے عوض دو وکٹ حاصل کرنے والے ذوالفقار بابر تھے، میچ کے اختتام پر ڈپٹی امریکی قونصل جنرل جے نائر، چیئرمین پی وی سی اے فواد اعجاز خان، لیجنڈری کرکٹر پاکستان ٹیم کے منٹور جاوید میانداد، کویٹہ گلیڈی ایٹرز کے فرنچائزر آصف عمر، ممبر سندھ اسمبلی آصف موسیٰ،
چیف ایگزیکٹو پی وی سی اے عامر بٹ، اعزازی سیکریٹری عامر سرفراز، سابق ٹیسٹ کرکٹر و چیف سلیکٹر پی وی سی اے اعجاز فقہہ نے کھلاڑیوں میں انعامات تقسیم کئے،
نیشنل اسٹیڈیم میں کھیلے جانے والے پہلے سمی فائنل میں آسٹریلیا نے ساؤتھ افریقہ کو پانچ وکٹ سے شکست دیکر گھر واپسی کا پروانہ تھما دیا، ساؤتھ افریقہ کے اسکور 151 کے جواب میں آسٹریلیا نے 19 ویں اوور میں پانچ وکٹ کے نقصان پر ہدف حاصل کرلیا،
فاتح ٹیم کے ناصر جلیل 23 گیندوں پر 41 رنز بناکر نمایاں بیٹر رہے، آسٹریلوی کھلاڑی بریٹسن ایڈورڈز نے شاندار آل راؤنڈر کارکردگی کا مظاہرہ کیا، انہوں نے 28 رنز دیکر تین وکٹ حاصل کرنے کے ساتھ 13 گیندوں پر 21 رنز اسکور کرکے اپنی ٹیم کی جیت میں اہم کردار ادا کیا۔۔۔
آئی ایم سی اوور فورٹی ٹی ٹوئنٹی ورلڈ کپ کا فائنل پاکستان اور آسٹریلیا کے درمیان پیر کو نیشنل اسٹیڈیم میں کھیلا جائے گا جبکہ فائنل میچ میں اسٹار آل راؤنڈر سابق کپتان و سابق چیف سلیکٹر شاہد آفریدی بھی ایکشن میں نظر آئینگے۔
ہفتے کو کھیلے جانے والے پلے آف کے میچز میں زمبابوے نے ویسٹ انڈیز کو، متحدہ عرب امارات نے ریسٹ آف دی ورلڈ کو، ریسٹ آف دی گلف نے ہانگ کانگ کو اور کنیڈا نے سری لنکا کو شکست دیدی۔۔۔
