بیلجیئم کی ہاکی ٹیم کا وطن واپسی پر شاندار استقبال،ویڈیو رپورٹ دیکھیں

برسلز(سپورٹس لنک رپورٹ )ہاکی کا ورلڈ کپ جیتنے کے بعد بیلجیئم کی ہاکی ٹیم کا گذشتہ روز برسلز میں زبردست استقبال کیا گیا۔ ہزاروں افراد اس کی سینٹرل کمیون (1000 برسلز ) میں اکٹھے ہوگئے ۔ جہاں سب سے پہلے مئیر فلپ کلاز اور دیگر حکام نے اس کا استقبال کیا۔بعد ازاں ٹیم کے ارکان باری باری گیلری میں آتے رہے اور عوام ان کا استقبال کرتے رہے ۔ سب سے آخر میں ٹیم کے کیپٹن ٹرافی کے ساتھ نمودار ہوئے جس کے بعد عوام کا جوش و خروش دیدنی تھا۔لوگوں نے انتہائی خوشی اور نعروں کے ساتھ ان کا استقبال کیا ۔ بعد ازاں قومی ترانوں کے ساتھ تقریب اختتام پذیر ہوگئی۔اس موقع پر بیلجیئم کی فضائیہ کے چار طیاروں نے فلائی پاسٹ بھی کیا ۔قبل ازیں منگل کی صبح 6 بجکر 45 منٹ پر جب قومی ہاکی ٹیم واپس پہنچی تو انہیں سیدھا شاہی محل لیجا یا گیا جہاں کنگ فلپ اور کوئین ماتھلڈ نے انہیں خوش آمدید کہا ۔یاد رہے کہ ہاکی کی تاریخ میں بیلجیئم کی یہ پہلی سب سے بڑی جیت ہے جو اس نے بھارتی شہر بھونیشور میں نیدر لینڈ کے خلاف 2 کے مقابلے میں 3 گول سے حاصل کی۔