نیوزی لینڈ بمقابلہ انگلینڈ:پہلا ڈے اینڈ نائٹ ٹیسٹ دوسرا روز بارش سے متاثر

آکلینڈ (سپورٹس لنک رپورٹ)نیوزی لینڈ اور انگلینڈ کے درمیان پہلے ڈے اینڈ نائٹ ٹیسٹ میچ کا دوسرا روز بارش سے متاثر ہوا اور صرف 33 اوورز کا کھیل ممکن ہو سکا، میزبان کیویز نے دوسرے روز کھیل ختم ہونے تک اپنی پہلی اننگز میں 4 وکٹوں کے نقصان پر 229 رنز بنا کر مجموعی طور پر 171 رنز کی برتری حاصل کر لی ہے، کپتان کین ولیمسن نے شاندار بلے بازی کا مظاہرہ کرتے ہوئے سنچری سکور کی اور 102 رنز بنا کر نمایاں رہے، ہنری نیکولز 49 اور بی جے واٹلنگ 17 رنز کے ساتھ وکٹ پر موجود ہیں، جیمز اینڈرسن نے 3 وکٹیں لیں۔جمعہ کو آکلینڈ ٹیسٹ کے دوسرے روز میزبان نیوزی لینڈ نے 175 رنز 3 کھلاڑی آئوٹ پر پہلی ادھوری اننگز دوبارہ شروع کی تو ولیمسن 91 اور نیکولز 24 رنز پر کھیل رہے تھے، میچ کا دوسرا روز بارش سے بری طرح متاثر ہوا اور صرف 33 اوورز کا کھیل ہی ممکن ہو سکا، ولیمسن شاندار سنچری مکمل کرنے کے بعد 102 رنز بنا کر اینڈرسن کی گیند پر ایل بی ڈبلیو ہوئے، کیویز نے 4 وکٹوں کے نقصان پر 229 رنز بنائے تھے کہ بارش شروع ہو گئی جس کے بعد کھیل ممکن نہ ہو سکا، نیکولز 49 اور واٹلنگ 17 رنز بنا کر ناقابل شکست ہیں، اینڈرسن نے 3 اور براڈ نے ایک وکٹ لی۔