اسلام آباد ( سپورٹس لنک رپورٹ )وزیر مملکت برائے داخلہ شہریار آفریدی نے کہا ہے کہ عالمی کرکٹ کو واپس لانا حکومت کی ترجیح ہے ہم نے یہ نہیں دیکھنا کہ دنیا کیا کہہ رہی ہے بلکہ ہمیں اپنے مفادات کو دیکھنا ہے۔اسلام آباد میں لیک ویو پارک میں شجر کاری کے موقع پر میڈیا سے بات کرتے ہوئے وزیرمملکت کا کہنا تھا کہ ہم نے دہشت گردی کے خلاف جنگ میں بےشمار قربانیاں دی ہیں،اس کے نتائج سامنے آنے چاہئیں، ہر حکمران اور ریاست کو اپنی سوچ اور بات کہنے کی آزادی ہے۔شہریار آفریدی کا کہنا ہے کہ ہم نے دنیا اور انسانیت کو باور کرانا ہے کہ ہماری قربانیاں رائیگاں نہیں جائیں گی۔پاکستان میں انٹرنیشنل کرکٹ کی بحالی کے حوالے سے شہریار آفریدی کا کہنا تھا کہ کہ پاکستان سپر لیگ (پی ایس ایل) سمیت تمام انٹرنیشنل کرکٹ پاکستان واپس آئے گی، عالمی کرکٹ کو واپس لانا حکومت کی ترجیح ہے، ہم اس کے لیے تمام اقدامات کررہے ہیں۔
