Tag: پی سی بی

لاہور( سپورٹس لنک رپورٹ)پاکستان کرکٹ بورڈ کے چیئرمین نجم سیٹھی نے کہا ہے کہ پاکستان سپر لیگ کا فائنل کراچی میں نہیں ہوا تو کہیں نہیں ہوگا۔

پاکستان سپر لیگ کا تیسرا ایڈیشن متحدہ عرب امارات میں جاری ہے جس کے 2 پلے آف میچز قذافی اسٹیڈیم لاہور اور فائنل کراچی کے نیشنل اسٹیڈیم میں کھیلا جانا ہے۔

گزشتہ دنوں پاکستان کرکٹ بورڈ کے چیئرمین نجم سیٹھی نے کراچی والوں کو فائنل میچ کی خوشخبری سناتے ہوئے نیشنل اسٹیڈیم کا دورہ کرنے کا اعلان کیا تھا۔

چیئرمین پی سی بی نجم سیٹھی نے نیشنل اسٹیڈیم کا دورہ کیا اور فائنل میچ کے حوالے سے گراؤنڈ کی تزئین و آرائش کا جائزہ لیا۔

اس موقع پر صحافیوں سے غیر رسمی گفتگو کرتے ہوئے نجم سیٹھی نے کہا کہ کراچی میں فائنل کے حوالے سے بار بار سوال نہ کریں۔

انہوں نے دو ٹوک انداز میں کہا کہ پی ایس ایل کا فائنل کراچی میں نہیں ہوگا توکہیں نہیں ہوگا۔

شارجہ(سپورٹس لنک رپورٹ): پاکستان کرکٹ بورڈ نے پی ایس ایل کے تیسرے ایڈیشن میں سٹے بازی کی کوشش ناکام بنادی اور ایک بکی کی تفصیلات بھی جاری کردیں۔

پی سی بی کے مؤثر اقدامات کی وجہ سے انٹرنیشنل سٹے بازوں کے نیٹ ورک کی پاکستان سپر لیگ (پی ایس ایل) کو بدنام کرنے کی ایک اور سازش ناکام ہوگئی اور غیر ملکی گروہ سے تعلق رکھنے والے سٹے باز اپنے عزائم میں کامیاب نہیں ہوسکے۔

پی سی بی کی جانب سے ایک بکی کی تصویر بھی جاری کی گئی، عمر نامی بکی کا تعلق بنگلادیش سے ہے۔

سٹے بازوں نے اسپاٹ فکسنگ کی کوشش کی اور اس بار کھلاڑیوں سے رابطے کا ذریعہ سوشل میڈیا ویب سائٹس تھیں، جسے پاکستان کرکٹ بورڈ کے اینٹی کرپشن یونٹ نے ناکام بنا دیا۔

پاکستان کرکٹ بورڈ کے تفتیش کاروں نے انٹیلی جنس نیٹ ورک کے ذریعے جو شواہد حاصل کیے ہیں، اس کے مطابق ان سٹے بازوں کا تعلق بھارت اور بنگلہ دیش سے ہے، جنہوں نے پاکستان سپر لیگ کے دوران کم از کم تین ٹیموں کے کھلاڑیوں سے واٹس ایپ اور فیس ٹائم کے ذریعے رابطہ کیا تھا، لیکن تینوں کرکٹرز نے فوری طور پر اس واقعے کو رپورٹ کردیا ہے۔

پاکستان کرکٹ بورڈ کے حد درجہ مصدقہ اور قابل اعتماد ذرائع نے تصدیق کی ہےکہ ان کے پاس اس بات کے ٹھوس شواہد ہیں کہ دونوں سٹے باز دبئی میں دکھائی دیئے ہیں تاہم ابھی تک ٹیم ہوٹلوں سے دور ہیں۔

اگرچہ پاکستان کرکٹ بورڈ کے انسداد کرپشن یونٹ نے گذشتہ سال شرجیل خان اور خالد لطیف کے واقعے کے بعد مزید سخت اقدامات کیے ہیں، تاہم اس کے باوجود دونوں سٹے بازوں نے دبئی آکر کم از کم تین کھلاڑیوں سے واٹس ایپ اور فیس ٹائم کے ذریعے رابطہ کیا ہے لیکن ماضی کے تلخ تجربات کے باعث تینوں کھلاڑیوں نے اس واقعے کی رپورٹ اپنی ٹیموں اور پاکستان کرکٹ بورڈ کے کرنل اعظم کو دے دی، جس کے بعد انسداد کرپشن یونٹ فوری ایکشن میں آیا ہے۔

انسداد کرپشن یونٹ نے تمام ٹیموں کے کھلاڑیوں کو نئی بریفنگ دی، جس میں بتایا گیا کہ دونوں سٹے بازوں کی دبئی آمد کی اطلاع ہے۔ بریفنگ میں ایک سٹے باز کی تصویر بھی دکھائی گئی اور کھلاڑیوں کو ہدایت کی گئی ہے کہ ان میں سے کوئی بھی شخص ٹیم ہوٹل کے ارد گرد دکھائی دے تو اس کی فوری رپورٹ پاکستان کرکٹ بورڈ کو کردی جائے۔

دوسری جانب پاکستان کرکٹ بورڈ نے اپنے طور پر جو تحقیقات کی ہیں، اس کے مطابق دونوں سٹے بازوں کا تعلق انٹرنیشنل مافیا سے ہے اور دونوں آئی سی سی اور ٹیسٹ کھیلنے والے ملکوں کی فہرست میں بلیک لسٹ ہیں۔

سٹے بازوں کی جانب سے اس نئی پیشکش کے بعد پی سی بی اینٹی کرپشن یونٹ کی جانب سے دبئی کے ہوٹلوں میں ہنگامی بریفنگ کا اہتمام کیا گیا جس میں کھلاڑیوں کو ایک بار پھر خبردار کیا گیا۔

عینی شاہدین کے مطابق ایک سٹے باز کی تصویر بھی کھلاڑیوں کو دکھائی گئی، کھلاڑیوں کا کہنا ہے کہ انہوں نے اس حلیے کے کسی شخص کو نہیں دیکھا ہے، تاہم پی سی بی کے تفتیش کاروں نے سی سی ٹی وی کیمروں کی مدد سے صورتحال کا جائزہ لیا ہے، جس کے مطابق دونوں غیر ملکی سٹے باز ٹیم ہوٹلوں کے قریب دکھائی نہیں دیئے، البتہ برطانوی کرائم ایجنسی اور آئی سی سی کی جانب سے اس بات کے ٹھوس شواہد ہیں کہ بین الاقوامی گروہ سے تعلق رکھنے والے دونوں خطرناک سٹے باز دبئی میں موجود ہیں۔

پی سی بی نے کھلاڑیوں سے بھی کہا ہے کہ وہ سوشل میڈیا سائٹس کے استعمال میں احتیاط برتیں۔

پاکستان کرکٹ بورڈ کے چیئرمین نجم سیٹھی دو دن قبل دبئی سے لاہور چلے گئے ہیں، تاہم انہیں اس تازہ پیش رفت سے آگاہ کردیا گیا ہے۔

پاکستان کرکٹ بورڈ خوش ہے کہ اس بار کھلاڑیوں نے ذمے داری دکھائی ہے تاہم کھلاڑیوں کے گرد گھومتے اس گروہ کے اراکین، پی سی بی کے لیے تشویش کا باعث ہیں۔بورڈ پُر امید ہے کہ انٹیلی جنس نیٹ ورک کے ذریعے انسداد کرپشن کے اقدامات مزید مؤثر اور مربوط ہوں گے۔

گذشتہ سال پاکستان سپر لیگ میں شرجیل خان اور خالد لطیف کے اسپاٹ فکسنگ واقعے کو سامنے رکھتے ہوئے پاکستان کرکٹ بورڈ حکام اس بار زیادہ محتاط ہیں اور کوئی خطرہ مول لینے کو تیار نہیں ہیں۔

یہی وجہ ہے کہ ٹورنامنٹ کو کرپشن سے پاک کرنے کے لیے سخت اقدامات کیے گئے ہیں اور فرنچائزوں کو ضابطہ اخلاق میں جکڑ دیا گیا ہے۔

دوسری جانب پی ایس ایل چیئرمین نجم سیٹھی اور پی سی بی اینٹی کرپشن یونٹ کے حکام آئی سی سی کی معاونت سے پورے سسٹم کو مانیٹر کر رہے ہیں۔ ٹورنامنٹ کے اختتام تک کھلاڑیوں کو نجی دوروں کی اجازت نہیں ہے اور وہ صرف ٹیم کے ساتھ ہی کہیں جا سکتے ہیں۔کسی مہمان کے آنے کی صورت میں بھی کھلاڑی اس سے صرف ٹیم ہوٹل میں ہی ملاقات کر سکتے ہیں۔

دوسری جانب فرنچائز مالکان کو بھی کھلاڑیوں کے کمروں تک رسائی نہیں ہے، حتیٰ کہ انہیں کھلاڑیوں کے فلور پر کمرے دینے کی بھی اجازت نہیں دی گئی۔کھلاڑیوں کو بھی اپنے مہمانوں کو کمروں میں بلانے کی اجازت نہیں البتہ وہ اپنے مہمانوں اور دوستوں سے ہوٹل کی لابی میں ملاقات کر سکتے ہیں۔

اینٹی کرپشن یونٹ کی ہدایات کے مطابق کرکٹرز کو ہوٹل سے باہر جانے کی صورت میں سیکیورٹی افسر کو مطلع کرنا ہوتا ہے جو ان کے ساتھ جاتا ہے۔ پی سی بی نے تمام کھلاڑیوں کو نئے سم کارڈز بھی دیئے ہیں جس کا تمام تر ڈیٹا ریکارڈ کیا جارہا ہے، جس کی بورڈ کا اینٹی کرپشن یونٹ مستقل نگرانی کر رہا ہے۔

واضح رہے کہ گذشتہ سال اسپاٹ فکسنگ اسکینڈل کی وجہ سے پانچ کرکٹرز شرجیل خان، خالد لطیف، محمد عرفان، شاہ زیب حسن اور ناصر جمشید کو سزائیں اور بھاری جرمانے ہوچکے ہیں۔

اسلام آباد(سپورٹس لنک رپورٹ)قومی اسمبلی کی قائمہ کمیٹی برائے بین الصوبائی رابطہ نے پاکستان سپرلیگ (پی ایس ایل) کے ابتدائی دو ایڈیشنز کی آڈٹ رپورٹ منظر عام پر لانے کا مطالبہ کرتے ہوئے چیئرمین پی سی بی سے بریفنگ لینے کا فیصلہ کرلیا۔

قومی اسمبلی کی قائمہ کمیٹی برائے بین الصوبائی رابطہ کا اجلاس عبد القہار خان ودان کی زیر صدارت ہوا جہاں دیگر اراکین نے پی ایس ایل کے ابتدائی دونوں ایڈیشنز کی آڈٹ رپورٹ منظر عام لانے کا مطالبہ کیا۔

کمیٹی کے چیئرمین نے فیصلہ کیا کہ پی ایس ایل کی آڈٹ رپورٹس پر پاکستان کرکٹ بورڈ (پی سی بی)کے چیئرمین نجم سیٹھی سے بورڈ کے ہیڈ کوارٹرز میں بریفنگ لیں گے۔

کمیٹی کے رکن اقبال محمد علی کا کہنا تھا کہ پی سی بی جان بوجھ کر آڈٹ رپورٹس سامنے نہیں لارہا حالانہ پی ایس ایل کے معاملے پر وزیر اعظم، قومی احتساب بیورو (نیب) اور وفاقی تحقیقاتی ادارے (ایف آئی اے) کو خطوط بھی لکھے۔

ان کا کہنا تھا کہ پی ایس ایل میں من پسند افسران کو دو گنا تنخواہوں سے نوازا گیا اور پورا کرکٹ بورڈ دبئی میں پی ایس ایل دیکھنے کے لیے بیٹھا ہوا ہے۔

سردار شفقت حیات نے کہا کہ پی سی بی اپنی آڈٹ رپورٹس سامنے لائے، جب بھی پی سی بی پر کوئی مصیبت آتی ہے تو اس کو بچانے کے لیے وزارت آگے آتی ہے۔

اس معاملے پر سخت اقدامات اٹھانے کا عندیہ دیتے ہوئے چیئرمین قائمہ کمیٹی کا کہنا تھا کہ پاکستان کا جھنڈا لہرانے کی اجازت نہ دیے پھر تو سب سیدھے ہو جائیں۔

وفاقی وزیر بین الصوبائی رابطہ ریاض پیرزادہ کا کہنا تھا کہ پی سی بی پہلے وزارت کو بھی جواب نہیں دیتا تھا۔

ان کا کہنا تھا کہ پی سی بی کو قابو کرنے کے لیے سیکریٹری آئی سی سی کو گورننگ بورڈ میں شامل کروایا گیا تھا۔

پی ایس ایل کے حوالے سے بات کرتے ہوئے وفاقی وزیر نے کہا کہ پی ایس ایل کے معاملات میں تو وزارت کو پوچھا بھی نہیں جاتا۔

یاد رہے کہ پی ایس ایل کے رواں ایڈیشن کے آغاز سے پہلے پی ایس ایل فرنچائزوں کی جانب سے مکمل ادائیگیاں نہ کرنے کا معاملہ سامنے آیا تھا اور بورڈ کی جانب سے اس حوالے سے خدشات کا بھی اظہار کیا گیا تھا۔

تاہم فرنچائز مالکان کی جانب سے بروقت اقدامات کیے گئے اور پی ایس ایل 2018 کے انعقاد میں کسی قسم کی رکاوٹ سامنے نہیں آئی اور ٹورنامنٹ کا رنگارنگ تقریب کے بعد آغاز ہوگیا۔

بعد ازاں کمیٹی میں پاکستان اسپورٹس بورڈ کے ڈائریکٹر جنرل کی تعیناتی کے لیے ذیلی کمیٹی کی سفارشات پیش کی گئیں جس کو منظوری کے بعد وزارت قانون کو بھجوا دی جائیں گی۔

وفاقی وزیر ریاض پیر زادہ کا کہنا تھا کہ مستقل ڈی جی اسپورٹس بورڈ کی تقرری تک قائم مقام ڈی جی تعینات کیا جائے گا۔

لاہور( سپورٹس لنک رپورٹ)فیڈرل بورڈ آف ریو نیو نے قومی کرکٹرز کی آمدن ، ٹیکس ادائیگی اور اثاثوں سے متعلق جانچ پڑتال شروع کر دی ، پی سی بی کو کرکٹرز کی دو سال کی آمدن اور ٹیکس ادائیگی سے متعلق ریکارڈ فراہم کرنے کیلئے خط لکھ دیا گیا ، ایکسائز اینڈ ٹیکسیشن ،ایل ڈی اے اور نجی ہائوسنگ سوسائٹیوں سے بھی ریکارڈ حاصل کر کے آمدن کے مطابق اثاثوں کی مالیت اور ٹیکس ادائیگی کو دیکھا جائے گا۔ ذرائع کے مطابق ایف بی آر نے پی سی بی کو خط لکھ کر قومی کرکٹرز کی 2016اور2017 کی آمدنی اور ٹیکس ادائیگی کے بارے میں ریکارڈ فراہم کرنے کا کہا ہے ۔ ایف بی آر نے کھلاڑیوں کی جائیدادوں اور گاڑیوں کا ریکارڈ بھی حاصل کرنے کا فیصلہ کیا ہے جس کے تحت محکمہ ایکسائز اینڈ ٹیکسیشن ، ایل ڈی اے اور نجی ہائوسنگ سوسائٹی سے رابطہ کیا جائے گا اور کھلاڑیوں کی آمدن کے مطابق انکے پاس موجود گاڑیوں اورجائیدادوںکا جائزہ اور اس پر ٹیکس ادائیگی کی جانچ پڑتال کی جائے گی ۔فرق ثابت ہونے پر کھلاڑیوں کو نوٹسز جاری کئے جائیں گے۔