کامران اسٹیل پنجاب جونیئر ٹینس چیمپئن شپ ; اسد زمان، بسمل ضیا، اوحدِ مصطفیٰ اور ایمن ریحان چیمپئن قرار
کامران اسٹیل پنجاب جونیئر ٹینس چیمپئن شپ ;
اسد زمان، بسمل ضیا، اوحدِ مصطفیٰ اور ایمن ریحان چیمپئن قرار
لاہور: کامران اسٹیل پنجاب جونیئر ٹینس چیمپئن شپ 2025 میں نوجوان ٹینس اسٹارز اسد زمان اور بسمل ضیا نے بالترتیب انڈر 18 بوائز اور گرلز کے ٹائٹلز اپنے نام کر لیے، جبکہ اوحدِ مصطفیٰ اور ایمن ریحان نے انڈر 14 بوائز اور گرلز کے مقابلوں میں کامیابی حاصل کی۔
یہ ایونٹ پنجاب ٹینس اکیڈمی، باغِ جناح لاہور میں منعقد ہوا۔ اسد زمان اور بسمیل ضیا کا تعلق علی ایمبرائیڈری ملز سے ہے اور دونوں نامور کوچ راشد ملک کی زیرِ نگرانی تربیت حاصل کر رہے ہیں۔
بوائز انڈر 18 کے فائنل میں اسد زمان نے شاندار کارکردگی کا مظاہرہ کرتے ہوئے اوحدِ مصطفیٰ کو 8-2 سے شکست دی اور اپنی مضبوط بیس لائن کھیل اور غیر معمولی حکمتِ عملی سے سب کو متاثر کیا۔
گرلز انڈر 18 کے فائنل میں بسمل ضیا نے ایشا ربی کے خلاف یکطرفہ مقابلے میں 6-0 سے فتح حاصل کی۔ دونوں کھلاڑیوں کی کامیابی نے انفرادی صلاحیت کے ساتھ ساتھ راشد ملک کی منظم کوچنگ کے مثبت اثرات کو بھی اجاگر کیا۔
چیمپئن شپ میں مختلف عمر کی کیٹیگریز میں سخت مقابلے دیکھنے میں آئے، جو پنجاب میں جونیئر ٹینس کے بڑھتے ہوئے معیار کا ثبوت ہیں۔ بوائز انڈر 14 کے فائنل میں اوحدِ مصطفیٰ نے ایم معاذ کو سخت مقابلے کے بعد 7-6 سے شکست دے کر ٹائٹل جیتا، جبکہ گرلز انڈر 14 میں ایمن ریحان نے ایشا ربی کو 6-0 سے ہرایا۔
انڈر 14 ڈبلز فائنل میں ایم معاذ اور ایم ایان نے خدیجہ خلیل اور ابراہیم طلحہ کو 6-2 سے شکست دی۔ بعدازاں ایم معاذ نے بوائز انڈر 12 کا فائنل بھی جیت لیا،
جہاں انہوں نے ایم ایان کو 7-6 سے ہرایا۔ گرلز انڈر 12 میں خدیجہ خلیل نے ایمن ریحان کو 6-1 سے مات دی، جبکہ انڈر 10 مکسڈ فائنل میں دانیال افضل ملک نے ہادی علی رضوان کو 7-5 سے شکست دی۔
اختتامی تقریب کے مہمانِ خصوصی کامران اسٹیل ری رولنگ ملز پرائیویٹ لمیٹڈ کے عثمان علی اشرف اور پاکستان ٹینس فیڈریشن کے صدر اعصام الحق قریشی تھے۔ اس موقع پر پنجاب لان ٹینس ایسوسی ایشن کے فنانس سیکریٹری وقار نثار، کھلاڑیوں اور ان کے اہلِ خانہ کی بڑی تعداد بھی موجود تھی۔
پی ایل ٹی اے کے سینئر ایگزیکٹو نائب صدر راشد ملک نے کامران اسٹیل کا پنجاب میں ٹینس کے فروغ کے لیے مسلسل تعاون پر شکریہ ادا کیا۔ انہوں نے علی ایمبرائیڈری ملز کے طارق زمان کا بھی خصوصی طور پر شکریہ ادا کیا
جنہوں نے چیمپئن کھلاڑیوں اسد زمان اور بسمیل ضیا کی سرپرستی کی، جبکہ فاطمہ گروپ کے علی مختار کی جانب سے ایم معاذ اور ایم ایان کی معاونت کو بھی سراہا۔ راشد ملک نے اعصام الحق قریشی کی موجودگی اور نوجوان کھلاڑیوں کی حوصلہ افزائی پر بھی اظہارِ تشکر کیا۔
اس موقع پر گفتگو کرتے ہوئے اعصام الحق قریشی نے تمام فاتحین اور رنرز اپ کو مبارکباد دی اور جونیئر ٹینس کی ترقی کے لیے پی ٹی ایف کے عزم کا اعادہ کیا۔
انہوں نے بتایا کہ فیڈریشن باصلاحیت نوجوان کھلاڑیوں کو زیادہ سے زیادہ قومی اور بین الاقوامی مواقع فراہم کرنے کے لیے کوشاں ہے، جن میں بیرونِ ملک تربیتی پروگرام بھی شامل ہیں،
اور شایان آفریدی اور راشد علی اس کی حالیہ مثالیں ہیں۔ انہوں نے نوجوان کھلاڑیوں پر زور دیا کہ وہ محنت جاری رکھیں، کیونکہ پی ٹی ایف آئی ٹی ایف جونیئر ایونٹس اور ترقیاتی منصوبوں کے ذریعے جونیئر ٹینس کی مکمل حمایت جاری رکھے گی۔
