دوسرا ٹیسٹ، جنوبی افریقن ٹیم پر اعتماد آغاز کے بعد لڑکھڑا گئی

بھارت کے خلاف دوسرے کرکٹ ٹیسٹ میچ کے پہلے روز جنوبی افریقن بیٹنگ لائن اپ پر اعتماد آغاز کے بعد لڑکھڑا گئی، میزبان ٹیم نے پہلے روز کھیل کے اختتام تک اپنی پہلی اننگز میں 6 وکٹوں کے نقصان پر 269 رنز بنا لئے تھے، کپتان فاف ڈوپلیسی 24 اور کیشو مہاراج 10 رنز کے ساتھ وکٹ پر موجود ہیں، میچ کے پہلے روز ایڈن مرکرام اور ہاشم آملہ کے سوا پروٹیز کا کوئی بھی کھلاڑی خاطرخواہ کارکردگی کا مظاہرہ نہ کر سکا، ایڈن اور آملہ نے ڈٹ کر حریف باؤلرز کا مقابلہ کیا اور بالترتیب 94 اور 82 رنز کی اننگز کھیل کر ٹیم کی پوزیشن کو بہتر کیا، ایشون نے 3 کھلاڑیوں کو آؤٹ کیا۔ ہفتے کو سینچورین میں شروع ہونے والے دوسرے ٹیسٹ میچ میں جنوبی افریقن قائد ڈوپلیسی نے ٹاس جیت کر پہلے بیٹنگ کا فیصلہ کیا تو ایڈن مرکرام اور ڈین ایلگر نے عمدہ بلے بازی کا مظاہرہ کرتے ہوئے ٹیم کو 85 رنز کا آغاز فراہم کیا

یہاں پر ایشون نے ایلگر کو آؤٹ کر کے ٹیم کو پہلی کامیابی دلائی، ایلگر 31 رنز بنا کر کیچ آؤٹ ہوئے، 148 کے سکور پر ایڈن مرکرام جو کہ اچھی بیٹنگ کر رہے تھے 94 کے انفرادی سکور پر ایشون کی گیند کا نشانہ بنے، ڈی ویلیئرز جنوبی افریقہ

کے تیسرے آؤٹ ہونے والے کھلاڑی تھے جو 20 رنز بنا کر ایشانت شرما کی گیند پر شکار ہوئے، 246 کے سکور پر پروٹیز کی چوتھی وکٹ گری جب ہاشم آملہ جو کہ بھرپور فارم میں تھے 82 رنز بنانے کے بعد رن آؤٹ ہو گئے، اس کے بعد ڈی کوک اور فلینڈر بغیر کوئی رن بنائے آؤٹ ہوئے تو پروٹیز پر دباؤ بڑھ گیا لیکن اس موقع پر کیشومہاراج نے کپتان کا ساتھ دیا، دونوں بلے بازوں نے محتاط انداز اپنایا اور دن ختم ہونے تک مزید کوئی نقصان نہ ہونے دیا، اسطرح پہلے روز جب کھیل ختم ہوا تو جنوبی افریقہ نے 6 وکٹوں کے نقصان پر 269 رنز بنا لئے تھے، ڈوپلیسی 24 اور مہاراج 10 رنز کے ساتھ وکٹ پر موجود ہیں، ایشون نے 3 اور ایشانت شرما نے ایک وکٹ لی۔