بڑے بھائی چھوٹے بھائیوں کے ساتھ ایسا سلوک نہیں کرتے،تمیم اقبال

راولپنڈی(سپورٹس لنک رپورٹ) بنگلہ دیشی کرکٹ ٹیم کے اوپنر تمیم اقبال کی جانب سے پاکستان کو بنگلہ دیش کا بڑا بھائی کہنے کے سوال پر دیا گیا جواب سوشل میڈیاپر چھا گیا- راولپنڈی ٹیسٹ کے دوران ایک صحافی نے تمیم اقبال سے سوال کیا کہ آپ کے اس بارے میں کیا احساسات ہیں کہ پاکستان بنگلہ دیش کا بڑا بھائی ہے- 30 سالہ تمیم اقبال نے اس سوال کے جواب میں مسکرتے ہوئے کہا کہ’’ بڑے بھائی اپنے چھوٹے بھائیوں کے ساتھ ایسا سلوک نہیں کرتے‘‘-یاد رہے کہ راولپنڈی ٹیسٹ میں پاکستان نے بنگلا دیش کو ایک اننگز اور 44 رنز سے شکست دے دی، یہ قومی ٹیم کی راولپنڈی میں 26 سال بعد ٹیسٹ کرکٹ میں پہلی کامیابی ہے۔

راولپنڈی میں بنگلا دیش کے خلاف کھیلے گئے ٹیسٹ میچ میں بنگلادیشی اپنی پہلی اننگز میں 233 رنز بناکر آؤٹ ہوئی جس کے جواب میں پاکستانی ٹیم 445 رنز بنانے کے بعد آؤٹ ہوئی اور یوں گرین شرٹس کو پہلی اننگز میں 212 رنز کی برتری حاصل ہوئی جس کے جواب میں مہمان ٹیم صرف 168 رنز پر ڈھیر ہوگئی۔

ٹیسٹ میچ کے چوتھے روز بنگلادیش نے 6 وکٹ کے نقصان پر 126 رنز سے اپنی نامکمل اننگز کا آغاز کیا تو شاہین شاہ آفریدی نے آغاز میں ہی بنگلادیشی کپتان مومن الحق کو پویلین واپس بھیج دیا وہ 41 رنز کی اننگز کھیل کر آؤٹ ہوئے جس کے بعد روبیل حسین محمد عباس کا شکار بنے اور باقی دو وکٹیں یاسر شاہ کے حصے میں آئیں۔

پاکستان کی جانب سے نسیم شاہ نے شاندار بولنگ کا مظاہرہ کیا اور کیریئر کی پہلی ہیٹ ٹرک کرتے ہوئے 4 وکٹیں حاصل کیں جب کہ یاسر شاہ نے بھی 4 وکٹیں اپنے نام کیں۔دوسری اننگز میں قومی ٹیم کی جانب سے بابراعظم 143، شان مسعود 100، حارث سہیل 75 اور اسد شفیق 65 رنز بناکر ٹاپ اسکورر ہے جب کہ بنگلا دیش کی جانب سے روبیل حسین اور ابوجائید نے 3،3 وکٹیں حاصل کیں۔راولپنڈی ٹیسٹ کا تیسرا روز پاکستان کے لیے یادگار رہا جس میں نسیم شاہ نے ٹیسٹ کرکٹ میں ہیٹ ٹرک کرنے والے دنیا کے کم عمر ترین بولر کا اعزاز اپنے نام کیا۔ خیال رہے قومی ٹیم کے ایک اور نوجوان بولر محمد حسنین پہلے ہی ٹی ٹونٹی کرکٹ میں ہیٹ ٹرک کرنے والے دنیا کے کم عمر ترین بولر کا اعزاز اپنے نام کرچکے ہیں۔