موسم سے متاثرہ ٹیسٹ میچ،آئی سی سی کرکٹ کمیٹی آئندہ اجلاس میں غور کریگی

کراچی(سپورٹس لنک رپورٹ)سابق کرکٹرز کی جانب سے موسم سے متاثرہ ٹیسٹ میچوں کے قوانین پر تنقید اور نظرثانی کے مطالبات کے بعد آئی سی سی نے خراب روشنی کے قوانین کا جائزہ لینے کا فیصلہ کرلیا ہے اور آئندہ اجلاس میں کرکٹ کمیٹی اس مسئلے پر غور کرے گی۔سابق قومی کپتان رمیز راجہ نے تجویز پیش کی ہے کہ ٹیسٹ میچوں میں ایک روز کے دوران چھ گھنٹے کا کھیل بارش یا خراب روشنی کی نذر ہو تو اضافی دن دیا جائے جبکہ کم روشنی کی صورت میں فاسٹ بالرز کو باؤنسرز کی اجازت نہیں ہونی چاہئے اور ہلکی بونداباندی میں بھی میچ جاری رکھا جائے۔

سابق انگلش کپتان ناصر حسین نے پلیئرز اور آفیشلز کی جانب سے میچ شروع کرانے میں عجلت کے فقدان پر مایوسی ظاہر کرتے ہوئے کہا کہ اکثریت قرنطینہ یا لاک ڈاؤن میں ہے اور لاتعداد افراد کئی ہفتوں سے خطرات کے شکنجے میں ہیں جن کی نگاہیں اگر ان کھلاڑیوں پر ہیں جن کو کھیلنے کا موقع میسر ہے تو پھر ان کو پرانی ذہنیت کو ترک کر کے میچ جاری رکھنا چاہئے۔ان کا مزید کہنا تھا کہ اگر ای سی بی حکام رواں سیزن میں مالی نقصان کے متحمل نہیں ہو سکتے تو پھر انہیں میچ دیکھنے کیلئے بے چین شائقین کو گنوانے سے بھی گریز کرنا چاہئے۔