ایشین گیمز ویمنز کرکٹ : بنگلہ دیش نے پاکستان کو 5 وکٹوں سے ہرادیا.

 

 

ایشین گیمز ویمنز کرکٹ : بنگلہ دیش نے پاکستان کو 5 وکٹوں سے ہرادیا۔

ہانگزو ( چین )

 

بنگلہ دیش کی خواتین کرکٹ ٹیم نے پاکستان کی خواتین کرکٹ ٹیم کو 5 وکٹوں سے شکست دے کر ایشین گیمز ویمنز کرکٹ میں کانسی کا تمغہ حاصل کرلیا۔

چین کے شہر ہانگزو میں ہونے والے 19 ویں ایشین گیمز کے ویمنز کرکٹ کے تیسری پوزیشن کے میچ میں بنگلہ دیش ویمنز نے ٹاس جیت کر پاکستان ویمنز کو بیٹنگ دی لیکن پاکستانی ٹیم مقررہ 20 اوورز میں 9وکٹوں کے نقصان پر صرف 64 رنز بنانے میں کامیاب ہوسکی۔

 

جواب میں بنگلہ دیش ویمنز نے مطلوبہ اسکور ۔2۔18 اوورز میں 5 وکٹوں کے نقصان پر پورا کرلیا۔

پاکستان ویمنز کی اننگز میں شوال ذوالفقار پہلے ہی اوور میں بغیر کوئی رن بنائے آؤٹ ہوگئیں۔

پاکستان ویمنز کو دوسرے اوور میں سدرہ امین کا نقصان برداشت کرنا پڑا جو صرف ایک رن بناسکیں۔

 

چھٹے اوور میں منیبہ علی صفر پر آؤٹ ہوئیں تو مجموعی اسکور صرف10 رنز تھا۔

عالیہ ریاض دو چوکوں کی مدد سے 17 رنز بناکر ٹاپ اسکورر رہیں۔

صدف شمس 13۔کپتان ندا ڈار 14۔ اور نتالیہ پرویز 11 رنز بنانے میں کامیاب ہوپائیں۔

 

بنگلہ دیش کی طرف سے شورنا اختر نے16 رنز دے کر3 وکٹیں حاصل کیں۔سنجیدہ اختر نے دو کھلاڑیوں کو آؤٹ کیا۔

بنگلہ دیش ویمنز کی اوپنرز شمیما سلطانہ اور شاتھی رانی نے 27 رنز کا آغاز دیا لیکن اس کے بعد پاکستانی بولرز وقفے وقفے سے وکٹیں حاصل کرنے میں کامیاب ہوتی رہیں تاہم کم اسکور ہونے کی وجہ سے وہ تمام تر کوشش کے باوجود بنگلہ دیش کو ہدف تک پہنچنے سے روکنے میں کامیاب نہ ہوسکیں۔ شمیما سلطانہ اورشاتھی رانی دونوں تیرہ تیرہ رنز بناکر نمایاں رہیں۔

شورنا اختر نے عمدہ بولنگ کے بعد بیٹنگ میں بھی ذمہ داری دکھائی اور 14رنز بناکر ناٹ آؤٹ رہیں۔
نشرہ سندھو 10 رنز دے کر3 وکٹیں حاصل کرکے سب سے کامیاب بولر رہیں۔

 

مختصر اسکور۔
پاکستان ویمنز64 رنز9 کھلاڑی آؤٹ ( 20 اوورز ) عالیہ ریاض17 ۔ندا ڈار14۔ صدف شمس13۔ شورنا اختر `16/ 3 وکٹ۔
بنگلہ دیش ویمنز۔ 65 رنز 5 کھلاڑی آؤٹ ( 18.2 اوورز ) شورنا اختر14 ناٹ آؤٹ۔شاتھی رانی13 ۔ شمیما سلطانہ 13۔ نشرہ سندھو 10 / 3 وکٹ