فوری کوئی رزلٹ نہیں ملتا، چیزیں برداشت کرنا پڑتی ہیں ؛ کپتان شاہین شاہ آفریدی

ٹی ٹوئنٹی فارمیٹ میں پاکستان کرکٹ ٹیم کے کپتان شاہین شاہ آفریدی نے کہا ہے کہ اِن کنڈیشنز میں کھیلنا آسان نہیں ہوتا، ٹیم تیار کر رہے ہیں۔

ان خیالات کا اظہار انہوں نے نیوزی لینڈ کے خلاف پانچویں اور آخری ٹی ٹوئنٹی میچ میں فتح یاب ہونے کے بعد اپنے ایک بیان میں کیا۔ انہوں نے کہا کہ نوجوان کھلاڑیوں کو اعتماد دینے کے لیے میچز میں موقع دیا ہے۔

شاہین آفریدی کا کہنا تھا کہ ٹی ٹوئنٹی ورلڈکپ 2024 کے لیے ٹیم تیار کر رہے ہیں، ورلڈ کپ تک سب کو علم ہو گا کہ کس نے کہاں کھیلنا ہے۔

قومی ٹیم کے کپتان نے مزید کہا کہ جب ٹیم تیار کرتے ہیں تو کچھ چیزیں ہو جاتی ہیں، انہیں برداشت کرنا پڑتا ہے۔

خیال رہے کہ پاکستان اور نیوزی لینڈ کے درمیان 5 میچز پر مشتمل ٹی ٹوئنٹی سیریز میں کیویز نے 1-4 سے برتری حاصل کرلی۔ شاہین کی بطور کپتان انٹرنیشنل میچز میں یہ پہلے جیت تھی۔

پانچویں ٹی ٹوئنٹی میچ میں پاکستان نے پہلے بیٹنگ کرتے ہوئے مقررہ اوورز میں 134 رنز کا ٹارگٹ دیا۔ جواب میں کیویز کی پوری ٹی صرف 92 رنز بنا کر آل آؤ ہوگئی۔ قومی ٹیم کی طرف سے افتخار احمد نے سب سے زیادہ 3 وکٹیں حاصل کیں۔

قومی ٹیم کے کپتان نے کہا کہ نوجوانوں کو کھلانے کا مقصد انہیں تجربہ دینا ہوتا ہے تاکہ وہ تیار ہو سکیں، بطور باؤلنگ یونٹ اچھی پرفارمنس نہیں دے سکے، پاکستان ٹیم ایک فیملی کی طرح ہے، سب کو ساتھ رکھتا ہوں۔

واضح رہے کہ پاکستان کا دورہ نیوزی لینڈ اختتام پذیر ہوگیا، پانچ ٹی 20 میچز کی سیریز چار ایک سے کیویز کے نام رہی۔