پی سی بی ویمنز یونیورسٹی کرکٹ ٹورنامنٹ شروع ؛ 14ٹیمیں ، 22 میچز

پی سی بی ویمنز یونیورسٹی کرکٹ ٹورنامنٹ 2024 کل سے شروع ہوگا۔

14ٹیمیں ، 22 میچز اور 210
کھلاڑی ایکشن میں ، میچز کراچی لاہور راولپنڈی اور ملتان میں ہونگے۔

لاہور 28 مئی 2024 : پہلا پی سی بی ویمنز یونیورسٹی کرکٹ ٹورنامنٹ 2024 کل سے لاہور، راولپنڈی، کراچی اور ملتان میں شروع ہوگا۔

ٹی ٹوئنٹی فارمیٹ کے اس ٹورنامنٹ میں مختلف یونیورسٹیز کی 14 ٹیمیں حصہ لیں گی جن میں کراچی زون اور لاہور زون کی چار ٹیمیں جبکہ ملتان زون اور راولپنڈی زون کی تین تین ٹیمیں ہوں گی۔

لیگ مرحلے کے اختتام پر ہر زون کی سرفہرست ٹیمیں فائنل کے لیے کوالیفائی کریں گے۔ ہر زون کا فائنل 3 جون کو کھیلا جائے گا۔

25 سال یا اس سے کم عمر کی طالبات ٹورنامنٹ میں حصہ لینے کی اہل ہوں گی جس سے پی سی بی کو خواتین کی کرکٹ میں نوجوان ٹیلنٹ کی نشاندہی کرنے میں مدد ملے گی۔ ہر ٹیم 15 کھلاڑیوں پر مشتمل ہوگی۔ ٹورنامنٹ کے دوران 210 کھلاڑی ایکشن میں نظر آئیں گی۔

کراچی زون میں نیوپورٹ یونیورسٹی، جامعہ کراچی، جناح یونیورسٹی برائے خواتین اور ہمدرد یونیورسٹی شامل ہیں۔ان کے میچز کراچی کے آئی بی اے گراؤنڈ میں کھیلے جائیں گے۔

لاہور زون ، لاہور کالج ویمن یونیورسٹی، پنجاب یونیورسٹی، گورنمنٹ کالج یونیورسٹی اور کینرڈ کالج پر مشتمل ہے یہ میچز COMSATS لاہور میں ہوں گے۔
SBBWU پشاور، فاطمہ جناح ویمن یونیورسٹی اور انٹرنیشنل اسلامک یونیورسٹی راولپنڈی زون میں شامل ہیں اور اپنے میچ وقار النساء کالج راولپنڈی میں کھیلیں گی۔

ملتان زون میں تین ٹیمیں بہاؤالدین زکریا یونیورسٹی ملتان، ویمن یونیورسٹی ملتان اور اسلامیہ یونیورسٹی بہاولپور شامل ہیں اور ان کے میچز بہاؤالدین زکریا یونیورسٹی میں ہونگے۔

پی سی بی ویمنز کرکٹ کی ہیڈ تانیہ ملک کا کہنا ہے کہ پہلا پی سی بی ویمنز یونیورسٹی کرکٹ ٹورنامنٹ خواتین کی کرکٹ میں ٹیلنٹ ُپول کو بڑھانے کے لیے ایک بہت بڑا قدم ہے۔

ملک کی 14 یونیورسٹیوں کی طالبات کو نہ صرف اپنی صلاحیتوں کا مظاہرہ کرنے بلکہ اس کھیل میں پیشہ ورانہ کریئر بنانے کا بھی بہترین موقع ملے گا۔ میں ٹورنامنٹ میں نئے ٹیلنٹ اور مسابقتی مقابلوں کی امید رکھے ہوئے ہوں۔