ماڈرن کرکٹ سے دوری ہی شکست کی وجہ بنی ہے ؛  کپتان بابراعظم

 کپتان بابراعظم نے کہا ہے کہ انگلینڈ سے سیریز ہارنے کا افسوس ہے،

سیریز جیت کر ٹی 20 ورلڈ کپ میں بلند حوصلوں کے ساتھ جانے کی ضرورت تھی۔

لندن میں میچ کے بعد پریس کانفرنس کرتے ہوئے قومی کپتان بابر اعظم نے کہا کہ ورلڈ کپ بالکل مختلف گیم ہے اس میں بہتر نتائج دیں گے۔

ان کا کہنا تھا کہ بلاشبہ مڈل اوورز میں بلے بازوں نے ذمہ داری سے بیٹنگ نہیں کی اور وکٹیں گنوائیں، یکے بعد دیگرے وکٹیں گرنے سے بڑا سکور نہیں کر سکے۔

بابر اعظم نے کہا کہ باؤلرز نے بھی اچھی باؤلنگ نہیں کی اور زیادہ رنز دیئے، اعظم خان سمیت تمام کا انتخاب میرٹ پر ہوا، شکست کے بعد سوالات اٹھتے ہیں۔

انہوں نے مزید کہا کہ کھلاڑیوں کو ماڈرن کرکٹ کھیلنی پڑے گی، جیت کے لیے سٹرائیک ریٹ بھی بڑھانا ہوگا۔

ایک سوال پر بابر اعظم کا کہنا تھا کہ امریکا کی کنڈیشنز سے واقف نہیں لیکن ویسٹ انڈیز کی کنڈیشنز سے بخوبی آگاہ ہیں،

تمام کھلاڑیوں کو اپنے رول کا پتا ہے ورلڈ کپ میں تمام کھلاڑیوں کو ذمہ داری لینا ہوگی، فتوحات کے سفر پر دوبارہ گامزن ہونے کے لیے ماڈرن کرکٹ کھیلنی ہوگی۔

انہوں نے کہا کہ مڈل اوورز میں بلے بازوں نے ذمہ داری نہیں دکھائی جبکہ اعظم خان سمیت تمام کھلاڑیوں کا انتخاب میرٹ پر ہوا ہے۔ انہوں نے کہا کہ تمام کھلاڑیوں کو اپنے رول کا پتہ ہے اور انہیں ذمہ داری لینا ہو گی۔

واضح رہے کہ انگلینڈ نے پاکستان کو ٹی 20 سیریز میں 2 صفر سے شکست دے دی۔ چوتھے اور آخری ٹی 20 میچ میں انگلینڈ نے پاکستان کو 7 وکٹوں سے شکست دی۔ پاکستان کے 4 کھلاڑی بغیر کوئی رن بنائے پویلین لوٹ گئے۔

قومی ٹیم پہلے بیٹنگ کرتے ہوئے 19.5 اوورز میں 157 رنز بنا کر آل آؤٹ ہو گئی۔ کپتان بابر اعظم اور عثمان خان کے علاوہ کوئی بیٹر بہتر کارکردگی نہ دکھا سکا۔

انگلینڈ نے پاکستان کا 158 رنز کا ہدف 15.3 اوورز میں 7 وکٹوں کے نقصان پر حاصل کر لیا۔