ٹی ٹوئنٹی ورلڈکپ جیتنے والی بھارتی کرکٹ ٹیم کا وطن واپسی پر تاریخی استقبال

آئی سی سی ٹی ٹوئنٹی ورلڈکپ جیتنے والی بھارتی کرکٹ ٹیم کا وطن واپسی پر تاریخی استقبال ہوا،

کھلاڑیوں نے وزیر اعظم نریندر مودی سے ملاقات کی اور پھر ممبئی میں وکٹری پریڈ کرتے ہوئے وانکھڈے اسٹیڈیم پہنچے جہاں شائقین کی بڑی تعداد نے ویلکم کیا۔

ٹی 20 ورلڈ کپ جیتنے کے بعد بالآخر بھارتی کرکٹ ٹیم اپنے وطن پہنچ گئی، چار روز بارباڈوس میں پھنسے رہنے کے بعد آج علی الصبح نئی دہلی پہنچی۔

پہلے ائیر پورٹ پر بورڈ حکام نے استقبال کیا ،کیک بھی کاٹا، فینز کی بہت بڑی تعداد نے اپنے ہیروز استقبال کےلیے پہنچی۔
اس موقع پر ڈھول کی تھاپ پر بھنگڑے بھی ڈالے گئے،

انڈیا پہنچنے کے بعد ٹیم کو ایک ہوٹل میں منتقل کیا گیا اور بعد میں انڈیا کے وزیراعظم نریندر مودی کی جانب سے ٹیم کے اعزاز میں ناشتے کا اہتمام کیا گیا۔

بھارتی کپتان روہت شرما نے بھی بھنگڑا ڈالا۔ جس کے بعد ٹیم کچھ دیر ہوٹل میں رکنے کے بعد وزیر اعظم نریندر مودی کی رہائش گاہ پہنچی۔ وزیر اعظم نے کپتان کوچ اور پوری ٹیم کو ٹائٹل جیتنے پر مبارک باد دی اور فوٹو سیشن بھی ہوا۔

بعد ازاں بھارتی ٹیم ممبئی پہنچی اور پھر میرین ڈرائیو پر بس کے ذریعے وکٹری پریڈ کرتے ہوئے وانکھڈے اسٹیڈیم کی طرف روانہ ہوئی۔
ممبئی میں وکٹری پریڈ میں ایسا منظر لگا کہ جیسے پورا شہر امڈ آیا، شائقین نے اپنی ٹیم کا تاریخی استقبال کیا اور کھلاڑیوں کی جھلک دیکھنے کے لیے سڑک پر نکل آئے۔

اس موقع پر کپتان روہت شرما اور اسٹار بیٹر ویرات کوہلی سمیت کھلاڑی اوپن بس میں موجود تھے اور انہوں نے شائقین کے سامنے ٹی ٹوئنٹی ورلڈ کپ کی ٹرافی اٹھائی۔

بھارتی ٹیم وکٹری پریڈ کے بعد وانکھڈے اسٹیڈیم پہنچی جہاں شائقین کی بڑی تعداد نے اپنی ٹیم کا استقبال کیا اور جیت کا جشن منایا۔ بھارتی ٹیم کے کپتان روہت شرما نے خطاب کرتے ہوئے کہا کہ یہ ورلڈکپ ٹرافی پوری قوم کی ہے۔