پی ایف ایف چیئرمین ہارون ملک کا سیالکوٹ چیمبر آف کامرس اینڈ انڈسٹری کا دورہ

پاکستان فٹبال فیڈریشن نارملائزیشن کمیٹی کے چیئرمین ہارون ملک نے سیالکوٹ چیمبر آف کامرس اینڈ انڈسٹری کا دورہ کیا۔

صدر سیالکوٹ چیمبر عبدالغفور ملک، سینئر نائب صدر وہاب جہانگیر، نائب صدر عامر مجید شیخ اور سیالکوٹ فٹبال ایسوسی ایشن کے صدر چوہدری محمد اخلاق نے ان کا استقبال کیا۔

اس دوران سیالکوٹ میں فٹبال کے فروغ کے حوالے سے بات چیت بھی ہوئی ۔ چیئرمین این سی ہارون ملک نے سیالکوٹ چیمبر کا دورہ کرنے پر سیالکوٹ میں فٹبال کی سرگرمیوں کو بڑھانے کے لیے کیے گئے اقدامات پر روشنی ڈالی۔

انہوں نے کہا کہ پی ایف ایف سیالکوٹ فٹبال ایسوسی ایشن کے ساتھ مل کر جلد ہی سیالکوٹ میں علاقائی اور صوبائی سطح کے فٹبال ٹورنامنٹ منعقد کرنے کا ارادہ رکھتی ہے۔

صدر سیالکوٹ چیمبر عبدالغفور ملک نے ملک بھر میں فٹبال کے فروغ پر چیئرمین ہارون ملک کی کاوشوں کو سراہا۔ انہوں نے فیفا ورلڈ کپ کوالیفائرز میں قومی فٹبال ٹیم کی کارکردگی اور پاکستان میں کوالیفائر میچوں کے کامیاب انعقاد کو فیڈریشن کی موثر قیادت کا مظہر قرار دیا۔

بعد ازاں چیئرمین پی ایف ایف این سی ہارون ملک نے سیالکوٹ میں فارورڈز سپورٹس کا دورہ بھی کیا جہاں چیف ایگزیکٹو فارورڈز سپورٹس خواجہ مسعود اختر نے ان کا استقبال کیا خواجہ مسعود نے چیئرمین این سی ہارون ملک کو دفتر کا دورہ کرایا اور شیلڈ بھی پیش کی