گلوبل ٹی 20 لیگ ؛ بابر، رضوان اور شاہین کو این او سی نہ جاری کرنے کا فیصلہ

پاکستان کرکٹ بورڈ کا بابراعظم۔ محمد رضوان اور شاہین شاہ آفریدی کو کینیڈا کی گلوبل ٹی ٹوئنٹی کے لیے این او سی جاری نہ کرنے کا فیصلہ ۔

یہ فیصلہ پاکستان کرکٹ کے غیرمعمولی مصروف سیزن اور کھلاڑیوں کے ورک لوڈ کو مدنظر رکھ کر کیا گیا ہے ۔ پی سی بی۔

بابراعظم۔ محمد رضوان اور شاہین شاہ آفریدی تینوں فارمیٹ کے کھلاڑی ہیں پاکستان ٹیم کو ان کی خدمات درکار ہونگی۔ پی سی بی ۔

پی سی بی چاہتا ہے کہ یہ تینوں کرکٹرز سیزن کے آغاز میں مکمل طور پر فٹ ہوں۔

پی سی بی نے افتخار احمد، محمد عامر، آصف علی اور محمد نواز کو این او سی جاری کردی۔

پاکستان کرکٹ بورڈ (پی سی بی) نے کینیڈا میں ہونے والی گلوبل ٹی 20 لیگ کیلئے قومی کرکٹ ٹیم کے کپتان بابر اعظم، محمد رضوان اور شاہین آفریدی کو این او سی جاری نہ کرنے کا فیصلہ کرلیا۔

پی سی بی کی جانب سے جاری اعلامیے میں کہا گیا ہے کہ گلوبل ٹی 20 کیلئے پی سی بی کو بابر اعظم، محمد رضوان اور شاہین آفریدی کی جانب سے این او سی کی درخواستیں موصول ہوئی تھیں۔

اعلامیے میں کہا گیا ہےکہ بورڈ نے پاکستان کرکٹ ٹیم کی غیرمعمولی مصروفیت، کھلاڑیوں اور سلیکشن کمیٹی سے مشاورت کے بعد ان تینوں کرکٹرز کو این او سی جاری نہ کرنے کا فیصلہ کیا ہے۔

بورڈ کے مطابق اگست 2024 سے مارچ 2025 کے عرصے میں پاکستان کرکٹ ٹیم کو آئی سی سی ورلڈ ٹیسٹ چیمپئن شپ کے 9 ٹیسٹ میچز کھیلنے ہیں، اس کے علاوہ آئندہ سال آئی سی سی چیمپئنز ٹرافی بھی کھیلنی ہے جس کا انعقاد پاکستان میں ہونا ہے،

اس طرح پاکستان اس عرصے میں 9 ٹیسٹ، 14 ون ڈے انٹرنیشنل اور 9 ٹی 20 انٹرنیشنل کھیلے گا لہٰذا تینوں کھلاڑی تینوں فارمیٹ کے کرکٹرز ہیں اور پاکستان کو آئندہ 8 ماہ میں ان کی خدمات درکار ہوں گی۔

پی سی بی کے مطابق پاکستان کرکٹ بورڈ کی ورک لوڈ مینجمنٹ پالیسی کے پیش نظر پاکستان کرکٹ اور کھلاڑیوں کے بہترین مفاد میں ہے کہ یہ کھلاڑی کینیڈا میں ہونے والے ایونٹ کو چھوڑ دیں تاکہ وہ سیزن کیلئے اپنی بہترین ذہنی اور جسمانی حالت میں ہوں جس کا آغاز بنگلا دیش کے خلاف دو ٹیسٹ میچوں کی سیریز سے ہوگا۔

اس سے قبل پی سی بی نے اسی بنیاد پر نسیم شاہ کو دی ہنڈریڈ کیلئے این او سی جاری نہیں کیا تھا۔

پی سی بی کے مطابق آصف علی، افتخار احمد، محمد عامر اور محمد نواز کیلئے این او سی کی منظوری دے دی گئی ہے، چاروں کھلاڑی بنیادی طور پر وائٹ بال کے کرکٹرز ہیں تاہم افتخار احمد اور محمد نواز سینٹرل کنٹریکٹ یافتہ کرکٹرز ہیں۔