SportsLink PK Latest Sports News in Urdu
پیرس اولمپکس 2024 میں حسب روایت پاکستانی شوٹرز نے مایوس کن کارکردگی کا مظاہرہ کیا ہے۔
پیرس اولمپکس میں پاکستانی شوٹرز گلفام جوزف اور کشمالہ طلعت انفرادی ایونٹ کے فائنل کے لیے کوالیفائی کرنے میں ناکام ہوگئے۔
دس میٹر ایئر پسٹل کے پہلے راؤنڈ میں گلفام کی 33 میں سے 22ویں پوزیشن رہی جبکہ کشمالہ طلعت کا 44 میں سے 31واں نمبر رہا۔
فائنل راؤنڈ میں جانے کے لیے دونوں شوٹرز کو ٹاپ 8 میں جگہ بنانی تھی۔
واضح رہے کہ پیرس اولمپکس کے ابتدائی دو گولڈ میڈل چین کے نام رہے ہیں، چینی ایتھلیٹس نے ڈائیونگ اور دس میٹر ایئر پسٹل ایونٹ میں سونے کے تمغے جیت لیے۔
جنوبی کوریا اور امریکا ایک، ایک سلور میڈل کے ساتھ دوسرے اور تیسرے نمبر پر موجود ہیں۔
دوسری جانب پیرس اولمپکس میں آج ہونے والے اسکیٹ بورڈنگ کے مقابلے ملتوی کردیے گئے ہیں۔
میڈیا رپورٹ کے مطابق پیرس اولمپکس میں آج مینز اسٹریٹ اسکیٹ بورڈنگ کا ایونٹ ہونا تھا تاہم رات بھر جاری بارش کی وجہ سے ٹریکس مقابلے کیلئے خشک نہ ہوسکے۔
مینز اسٹریٹ اسکیٹ بورڈنگ کے مقابلے اب پیر کو منعقد ہوں گے جبکہ اتوار کو خواتین کا ایونٹ شیڈول کے مطابق کھیلا جائے گا۔
