ویمنز ٹی 20 ورلڈ کپ ؛ بھارت نے پاکستان کو 6 وکٹوں سے شکست دیدی

 آئی سی سی ویمنز ٹی 20 ورلڈ کپ کے 7ویں میچ میں بھارت نے پاکستان کو 6 وکٹوں سے شکست دیدی۔

پاکستان ویمنز نے پہلے بیٹنگ کرتے ہوئے8 وکٹوں پر 105 رنز بنائے۔

ندا ڈار 28 رنز کے ساتھ ٹاپ اسکورر۔

ارون دھاتی ریڈی کی تین وکٹیں۔

انڈیا نے 18.5 اوورز میں 4 وکٹوں پر ہدف حاصل کرلیا۔

شفالی ورما 32اور ہرمنپریت کور 29 رنز کے ساتھ نمایاں۔

فاطمہ ثنا کی لگاتار گیندوں پر دو وکٹیں۔

پاکستان ٹیم اپنا تیسرا میچ 11 اکتوبر کو آسٹریلیا کے خلاف کھیلے گی

دبئی 6 اکتوبر۔ آئی سی سی ویمنز ٹی ٹوئنٹی ورلڈ کپ میں انڈیا ویمنز نے پاکستان ویمنز کو 6 وکٹوں سے شکست دیدی۔یہ اس ٹورنامنٹ میں انڈیا کی پہلی جیت اور پاکستان کی پہلی شکست ہے۔

اس سے قبل انڈیا کو نیوزی لینڈ کے خلاف 58 رنز سے شکست ہوئی تھی جبکہ پاکستان نے اپنے پہلے میچ میں سری لنکا کو31 رنز سے ہرایا تھا۔

اتوار کے روز دبئی کھیلے گئے میچ میں فاطمہ ثنا نے ٹاس جیت کر پہلے بیٹنگ کا فیصلہ کیا۔ انجرڈ ڈیانا بیگ کی جگہ عروب شاہ کو ٹیم میں شامل کیا گیا۔  اور مقررہ 20 اوورز میں 8 وکٹوں کے نقصان پر 105 رنز بناسکی۔

بھارتی ویمنز ٹیم نے 106 رنز کا ہدف 18.5 اوورز میں 4 وکٹوں کے نقصان پر باآسانی حاصل کرلیا، بھارت کی جانب سے شفالی ورما 32 رنز کیساتھ نمایاں رہیں۔

قبل ازیں پاکستان ٹیم کو پہلے ہی اوور میں گل فیروزہ ( صفر ) کا نقصان اٹھانا پڑا اور جب سدرہ امین 8 اور عمیمہ سہیل 3 رنز بناکر آؤٹ ہوئیں تو سات اوورز میں پاکستان کا اسکور 3 وکٹوں پر صرف 33 رنز تھا۔

منیبہ علی 26 گیندوں پر17 رنز بناکر آؤٹ ہوئیں ۔ پاکستان کی چوتھی وکٹ 41 کے اسکور پر گری ۔ اسکور کے 71 رنز تک آتے آتے عالیہ ریاض ( 4 ) فاطمہ ثنا ( 13 ) اور طوبٰی حسن ( صفر ) بھی آؤٹ ہوچکی تھیں۔

منیبہ علی کا کیچ 14 رنز پر ڈراپ ہوا جبکہ کپتان فاطمہ ثنا کا کیچ بھی صفر پر ڈراپ ہوا تاہم یہ دونوں ان مواقعوں سے فائدہ اٹھانے میں کامیاب نہیں ہوسکیں۔ دونوں مرتبہ فیلڈر آشا سوبھانا تھیں۔ ندا ڈار ایک چوکے کی مدد سے 28 رنز کے ساتھ ٹاپ اسکورر رہیں۔

انڈیا کی طرف سے ارون دھاتی ریڈی نے تین وکٹیں حاصل کیں۔ شریانکا پاٹل نے دو کھلاڑیوں کو آؤٹ کیا۔

پاکستان کو سمرتی مدھانا کی شکل میں اہم وکٹ جلد ہی مل گئی جو 7 رنز بناکر سعدیہ اقبال کی گیند پر طوبٰی حسن کے ہاتھوں کیچ ہوئیں ۔ شفالی ورما اور جیمیما راڈرگس نے اسکور میں 43 رنز کا اضافہ کیا۔

شفالی ورما تین چوکوں کی مدد سے 32 رنز بناکر عمیمہ سہیل کی گیند پر عالیہ ریاض کے ہاتھوں کیچ ہوگئیں۔
فاطمہ ثنا نے اپنے تیسرے اوور میں لگاتار گیندوں پر جیمیما ( 23) اور ریچا گھوش ( صفر ) کو آؤٹ کردیا۔

اسوقت انڈیا کا اسکور چار وکٹوں پر 80 رنز تھا تاہم کپتان ہرمنپریت کور نے 29 رنز اسکور کرکے اپنی ٹیم کی جیت کو ممکن بنادیا۔

ارون دھاتی ریڈی تین وکٹوں کی عمدہ کارکردگی پر پلیئر آف دی میچ قرار پائیں۔

پاکستان ٹیم اپنا تیسرا میچ 11 اکتوبر کو آسٹریلیا کے خلاف دبئی میں کھیلے گی۔

مختصر اسکور۔
پاکستان ویمنز 105 رنز 8 کھلاڑی آؤٹ ( 20 اوورز ) ۔ندا ڈار 28۔ ریڈی 19 / 3 وکٹ ۔ پاٹل 12 / 2 وکٹ۔

انڈیا ویمنز 108 رنز 4 کھلاڑی آؤٹ ( 18.5 اوورز ) ۔ شفالی ورما 30 ۔ہرمنپریت کور 29۔جیمیما راڈرگس 23۔ فاطمہ ثنا 23 / 2 وکٹ ۔

نتیجہ ۔ انڈیا ویمنز نے 6 وکٹوں سے جیتا۔

پاکستان ویمنز سکواڈ: منیبہ علی، گل فیروزہ، سدرہ امین، عمائمہ سہیل، ندا ڈار، طوبیٰ حسن، فاطمہ ثناء، عالیہ ریاض، ناشرہ سندھو، سعدیہ اقبال، سیدہ عروبہ شاہ۔

بھارتی ویمنز سکواڈ: سمرتی مندھانا، شفالی ورما، ہرمن پری کور، جمائمہ روجرز، رچا گوش، دیپتی شرما، سجیون سجانا، ارون دھتی ردی، شریانکا پٹیل، عاشا صوبانہ، رینوکا سنگھ۔