پاکستان کے آدم سعید نے بحرین ایمچور اوپن گالف چیمپئن شپ جیت لی

پاکستان کے آدم سعید نے بحرین ایمچور اوپن گالف چیمپئن شپ جیت لی

اسلام آباد،20 اکتوبر (سپورٹس لنک رپورٹ)

پاکستان کے نوجوان گالفر آدم سعید نے بحرین ایمچور اوپن گالف چیمپئن شپ جیت لی۔ انہوں نے 54 ہولز پر مشتمل چیمپئن شپ میں 13 انڈر کے سکور کے ساتھ پہلی پوزیشن حاصل کی۔

ان کا مجموعی سکور 203 سٹروک (68-67-68) رہا، جس نے ناصرف انہیں ٹائٹل جیتنے میں مدد فراہم کی بلکہ ڈی پی ورلڈ ٹور میں جگہ بھی فراہم کی، ساتھ ساتھ انہیں کنگ حمد ٹرافی کا دعوت نامہ بھی مل گیا۔

آدم سعید نے تینوں راؤنڈز میں شاندار کارکردگی دکھا کر قریب ترین حریف جے ملین پر سبقت رکھی جو 9 انڈر کے سکور کیساتھ دوسرے نمبر پر رہے۔

آدم سعید نے حال ہی میں یونیورسٹی آف ٹمپا امریکہ سے سپورٹس سائنسز میں ماسٹرز کی ڈگری حاصل کی ہے اور وہ پروفیشنل گالف کی دنیا میں قدم رکھنے کا ارادہ رکھتے ہیں۔

انہوں نے حالیہ پروفیشنل کوالیفائنگ سکول میں 2025 کے سیزن کیلئے پروفیشنل پلے کارڈ حاصل کیا۔ آدم کی پروفیشنل کیریئر کا آغاز 30 اکتوبر سے لاہور میں ہونے والی گیریژن اوپن گالف چیمپئن شپ سے ہوگا۔