قائداعظم ٹرافی کے پانچویں اور آخری راؤنڈ کا اختتام۔

قائداعظم ٹرافی : فیصل آباد ۔ ایبٹ آباد۔ سیالکوٹ ۔بہاولپور اور پشاور کی کامیابی۔

ٹیسٹ فاسٹ بالر محمد علی کی میچ میں 9 وکٹیں۔

لاہور وائٹس۔ پشاور اور سیالکوٹ نے سہ فریقی مرحلے کے لیے کوالیفائی کرلیا۔

محمد علی ۔ مہران سانول اور آفتاب احمد کی اننگز میں پانچ پانچ وکٹیں۔

سیالکوٹ کے محمد علی کی کراچی بلوز کے خلاف میچ میں 9 وکٹیں۔

قائداعظم ٹرافی کا سہ فریقی مرحلہ 26 نومبر سے شروع ہوگا۔

گروپ اے سے لاہور وائٹس گروپ بی سے پشاور اور

گروپ سی سے سیالکوٹ نے سہ فریقی مرحلے کے لیے کوالیفائی کرلیا ہے۔

——————————-

لاہور 22 نومبر ۔ نوازگوھر

قائداعظم ٹرافی کرکٹ ٹورنامنٹ کے پانچویں اور آخری راؤنڈ کے آخری روز فیصل آباد ۔ ایبٹ آباد۔ سیالکوٹ۔بہاولپور اور پشاور نے کامیابی حاصل کرلی۔

میرپور اسٹیڈیم میرپور میں سیالکوٹ نے کراچی بلوز کو 8 وکٹوں سے ہرادیا۔  سیالکوٹ کو جیتنے کے لیے 99 رنز کا ہدف ملا تھا جو اس نے دو وکٹوں پر حاصل کرلیا۔

اس سے قبل کراچی بلوز دوسری اننگز میں 224 رنز بناکر آؤٹ ہوگئی۔ سیف اللہ بنگش 105 رنز بناکر ناٹ آؤٹ رہے۔محمد علی نے89 رنز دے کر 5 وکٹیں حاصل کیں۔ میچ میں انہوں نے9 وکٹیں حاصل کیں۔

نیشنل گراؤنڈ اسلام آباد میں فیصل آباد نے اسلام آباد کو 247 رنز سے شکست دے دی۔

اسلام آباد کو جیتنے کے لیے 396 رنز کا ہدف ملا تھا لیکن پوری ٹیم صرف 148 رنز بناکر آؤٹ ہوگئی۔ شہزاد گل اور اسد رضا نے چار چار وکٹیں حاصل کیں۔اسد رضا نے میچ میں آٹھ وکٹیں حاصل کیں۔

ایبٹ آباد اسٹیڈیم ایبٹ آباد میں بہاولپور نے کراچی وائٹس کو 198 رنز سے ہرادیا۔
کراچی وائٹس کو جیتنے کے لیے 301رنز کا ہدف ملا تھا لیکن وہ صرف 102 رنز بناسکی۔ مہران سانول نے 22 رنز دے کر 5 وکٹیں حاصل کیں۔

ڈائمنڈ کرکٹ گراؤنڈ اسلام آباد میں ایبٹ آباد نے حیدرآباد کو 249 رنز سے ہرادیا۔
حیدرآباد کو جیتنے کے لیے345 رنز کا ہدف ملا تھا تاہم پوری ٹیم صرف 95 رنز پر آؤٹ ہوگئی۔ آفتاب احمد نے35 رنز دے کر 5 وکٹیں حاصل کیں۔

اس سے قبل ایبٹ آباد کی ٹیم دوسری اننگز میں 369 رنز بناکر آؤٹ ہوگئی۔شہاب خان 61 رنز بناکر ناٹ آؤٹ رہے۔ شہریار بلوچ جو گزشتہ روز اننگز میں پانچ وکٹیں حاصل کرچکے تھے میچ میں آٹھ وکٹیں حاصل کرنے میں کامیاب رہے۔

شعیب اختر کرکٹ اسٹیڈیم راولپنڈی میں پشاور نے راولپنڈی کے خلاف 26 رنز سے کامیابی حاصل کی۔

راولپنڈی کو میچ جیتنے کے لیے241 رنز کا ہدف ملا تھا لیکن پوری ٹیم 214رنز بناکر آؤٹ ہوگئی۔ عمرامین نے 65 رنز اسکور کیے۔نیاز خان اور معاذ صداقت نے تین تین وکٹیں حاصل کیں۔

پانچویں راؤنڈ کے اختتام پر تینوں گروپ کے پوائنٹس ٹیبل پر سرفہرست ٹیموں نے سنگل لیگ کی بنیاد پر کھیلے جانے والے سہ فریقی مرحلے کے لیے کوالیفائی کرلیا ہے جس کا آغاز 26 نومبر کو ہوگا ۔

ان ٹیموں میں گروپ اے سے لاہور وائٹس ( 99 پوائنٹس ) گروپ بی سے پشاور ( 89 پوائنٹس ) اور گروپ سی سے سیالکوٹ ( 90 پوائنٹس ) شامل ہیں۔