محسن نقوی سے بنگلہ دیشی ہائی کمشنر سے ملاقات ؛ کرکٹ کے فروغ پر تبادلہ خیال

وزیر داخلہ محسن نقوی سے بنگلہ دیشی ہائی کمشنر سےملاقات میں کرکٹ کے فروغ پر تبادلہ خیال

(اصغر علی مبارک)

اسلام آباد: وفاقی وزیر داخلہ محسن نقوی نے بنگلہ دیشی ہائی کمشنر محمد روح العالم صدیق سے ملاقات کی۔ محسن نقوی نے کہا کہ چیمپئنز ٹرافی کے کامیاب انعقاد کے لیے تمام تیاریاں مکمل کی جا رہی ہیں۔

بنگلہ دیشی ہائی کمشنر نے چیمپئنز ٹرافی ٹورنامنٹ کے انعقاد کے حوالے سے پاکستان کے لیے نیک خواہشات کا اظہار کیا۔
بنگلہ دیشی ہائی کمشنر نے انگلینڈ کے خلاف ٹیسٹ سیریز اور آسٹریلیا کے خلاف ٹی ٹوئنٹی سیریز میں پاکستان کرکٹ ٹیم کی کارکردگی کو سراہا۔

انہوں نے کہا کہ پاکستانی کرکٹ ٹیم کو بنگلہ دیش میں بے پناہ حمایت حاصل ہے۔ملاقات میں دو طرفہ تعلقات اور پاکستان اور بنگلہ دیش میں کرکٹ کے فروغ سمیت باہمی دلچسپی کے امور پر تبادلہ خیال کیا گیا۔

وزیر داخلہ نے کہا کہ وہ وزیراعظم کی خصوصی ہدایات پر جلد بنگلہ دیش کا دورہ کریں گے۔ انہوں نے کہا کہ دورے کا مقصد دوطرفہ تعلقات کو مضبوط بنانا ہے۔ انہوں نے کہا کہ پاکستان اور بنگلہ دیش کے درمیان دیرینہ برادرانہ تعلقات ہیں۔

انہوں نے مزید کہا کہ پاکستان بنگلہ دیش کے ساتھ مختلف شعبوں میں تعلقات کو مزید آگے بڑھانے کا خواہاں ہے۔
انہوں نے کہا کہ بنگلہ دیش پاکستان کے ساتھ برادرانہ تعلقات کو انتہائی قدر کی نگاہ سے دیکھتا ہے اور دونوں ممالک کے درمیان بہترین عوام سے تعلقات ہیں۔

بنگلہ دیشی ہائی کمشنر نے کہا کہ پاکستان میں پوسٹنگ ان کے کیریئر کا بہترین حصہ رہی ہے اور انہیں بے پناہ محبت ملی ہے۔ انہوں نے اس بات پر زور دیا کہ پاکستان کو سفارتی برادری میں بہترین ڈیوٹی سٹیشنز میں سے ایک سمجھا جاتا ہے۔

اجلاس میں سپیشل سیکرٹری اور ایڈیشنل سیکرٹری داخلہ، کمانڈنٹ فرنٹیئر کانسٹیبلری، چیف کمشنر، آئی جی اسلام آباد پولیس اور ڈی سی اسلام آباد نے بھی شرکت کی۔