پاکستانی اسپنر سفیان مقیم نے ٹی ٹوئنٹی انٹرنیشنلز میں اہم ریکارڈ اپنے نام کرلیا

 پاکستان کے اسپنر سفیان مقیم نے ٹی ٹوئنٹی انٹرنیشنلز میں پاکستان کے لیے اہم ریکارڈ اپنے نام کرلیا۔

واضح رہے کہ پاکستان نے 3 ٹی ٹوئنٹی میچز کی سیریز کے دوسرے میچ میں زمبابوے کو 10 وکٹوں سے ہرا کر سیریز میں0-2 کی ناقابل شکست برتری حاصل کرلی ہے۔

قومی ٹیم کے اسپنر سفیان مقیم نے شاندار بولنگ کرتے ہوئے2.4 اوورز میں صرف 3 رنز دے کر 5 کھلاڑیوں کو آؤٹ کیا۔اس کے ساتھ ہی سفیان مقیم نے پاکستانی بولر کی جانب سے ٹی ٹوئنٹی انٹرنیشنلز میں سب سے بہترین میچ فیگرز کا ریکارڈ اپنے نام کرلیا۔

خیال رہے کہ اس سے پہلے یہ اعزاز سابق فاسٹ بولر عمر گل کے پاس تھا جنہوں نے 2009 میں نیوزی لینڈ اور 2013 میں جنوبی افریقا کے خلاف 6 رنز دے کر 5 کھلاڑیوں کو آؤٹ کیا تھا۔