بحریہ ٹاؤن چیمپئنز ٹی ٹوئنٹی کپ : لیک سٹی پینتھرز نے اینگرو ڈولفنز کو 8 وکٹوں سے ہرادیا

بحریہ ٹاؤن چیمپئنز ٹی ٹوئنٹی کپ : لیک سٹی پینتھرز نے اینگرو ڈولفنز کو 8 وکٹوں سے ہرادیا۔

عمرصدیق کی جارحانہ نصف سنچری ، 8 چوکوں اور 4 چھکوں کی مدد سے78 رنز ناٹ آؤٹ اسکور کیے۔

————————-

راولپنڈی 8 دسمبر۔ نوازگوھر

بحریہ ٹاؤن چیمپئنز ٹی ٹوئنٹی کپ کے تیسرے میچ میں لیک سٹی پینتھرز نے اینگرو ڈولفنز کو 8 وکٹوں سے شکست دے دی۔ اس میچ کی خاص بات عمر صدیق کے جارحانہ 78 رنز ناٹ آؤٹ تھے جو ان کا ٹی ٹوئنٹی میں سب سے بہترین انفرادی اسکور بھی ہے۔

یہ پینتھرز کی پہلی کامیابی ہے۔ گزشتہ روز اسے پہلے میچ میں اے بی ایل اسٹالیئنز کے خلاف 35 رنز سے شکست ہوئی تھی۔

راولپنڈی کرکٹ اسٹیڈیم میں اتوار کو کھیلے گئے اس میچ میں پینتھرز کو شاداب خان کی خدمات حاصل نہیں تھیں جو کمر کی تکلیف کے سبب پہلے میچ میں بیٹنگ نہیں کرپائے تھے ۔ ان کی جگہ حیدرعلی نے کپتانی کی اور ٹاس جیت کر اینگلو ڈولفنز کو بیٹنگ دی۔

ڈولفنز نے 20 اوورز میں 8 وکٹوں کے نقصان پر 160 رنز بنائے۔

جواب میں پینتھرز نے 16 اوورز میں صرف دو وکٹوں کے نقصان پر ہدف حاصل کرلیا۔

ڈولفنز کی تین وکٹیں صرف 35 رنز پر گرگئی تھیں۔ صاحبزادہ فرحان 12 رنز بناکر آؤٹ ہوئے جس کے بعد محمد ابتسام نے اپنے پہلے ہی اوور میں سلمان خان جونیئر ( 7 ) اور کپتان عمرامین (صفر ) کو وکٹ کیپر عمرصدیق کے ہاتھوں کیچ کراکر ڈولفنز کی مشکلات بڑھادیں۔

محمد ہریرہ نے چار چوکوں اور ایک چھکے کی مدد سے 37 رنز کی اننگز کھیلی۔ محمد سلیمان نے دو چھکوں اور ایک چوکے کی مدد سے34 رنز بنائے۔ ان دونوں نے چوتھی وکٹ کی شراکت میں 40 رنز کا اضافہ کیا

لیکن عماد بٹ نے ان دونوں کے ساتھ ساتھ ثاقب خان کو بھی آؤٹ کردیا جس کے بعد غازی غوری کے تین چوکوں ایک چھکے کی مدد سے 27 رنز اور شایان شیخ کے چار چوکوں کی مدد سے 20 رنز کی وجہ سے ڈولفنز 160 تک پہنچنے میں کامیاب ہوئی۔

عماد بٹ نے 19 رنز دے کر 3 وکٹیں حاصل کیں۔محمد ابتسام نے دو کھلاڑی آؤٹ کیے۔

پینتھرز کو بھی ابتدا میں ہی نقصان اٹھانا پڑا جب شرجیل خان تین چوکوں کی مدد سے14 رنز بناکر آؤٹ ہوگئے ۔ عمرصدیق اور کپتان حیدرعلی نے دوسری وکٹ کی شراکت میں 101 رنز کا اضافہ کیا۔

عمرصدیق نے جارحانہ بیٹنگ کرتے ہوئے 4 چھکوں اور8 چوکوں کی مدد سے 78 رنز اسکور کیے اور آؤٹ نہیں ہوئے۔یہ ٹی ٹوئنٹی میں ان کا بہترین انفرادی اسکور ہے جو اس سے قبل 63 ناٹ آؤٹ تھا۔

حیدرعلی نے46 رنز بنائے جس میں 5 چوکے اور 2 چھکے شامل تھے۔ مبصرخان ایک چھکے اور دو چوکوں کی مدد سے16 رنز بناکر ناٹ آؤٹ رہے۔ عمر صدیق پلیئر آف دی میچ قرار پائے۔ پیر کے روز اے بی ایل اسٹالیئنز کا مقابلہ نور پور لائنز سے ہوگا