پاکستان نے پہلے ون ڈے میچ میں جنوبی افریقا کو 3 وکٹوں سے شکست دیدی

 پاکستان نے پہلے ون ڈے میچ میں جنوبی افریقا کو شکست دے دی،

پاکستان نے 240رنز کاہدف7وکٹوں کے نقصان پر آخری اوور میں حاصل کیا،

صائم ایوب نے 119گیندوں پر109رنز کی اننگز کھیلی،

ان کی اننگز میں 10چوکے،3 چھکے شامل تھے،یہ ان کے ون ڈے کیرئیر کی دوسری سنچری تھی۔

پارل میں ہونیوالے پاکستان اور جنوبی افریقا کی ٹیموں کے درمیان سیریز کے پہلے ون ڈے میچ میں جنوبی افریقا نے ٹاس جیت کر پہلے بیٹنگ کا فیصلہ کیا اور مقررہ 50 اوورز میں 9 وکٹوں کے نقصان پر 239 رنز بنائے۔

میزبان ٹیم کی جانب سے ہینرچ کلاسن 86 رنز بنا کر نمایاں رہے، ریان ریکلٹن نے 36 ، ایڈن مارکرم نے 35، ٹونی ڈی زورزی نے 33 اور مارکو جانسن نے 10رنز بنائے۔

پاکستان کی جانب سے سلمان آغا نے 4، ابرار احمد نے 2 جبکہ شاہین شاہ آفریدی اور صائم ایوب نے ایک ایک وکٹ حاصل کی۔

قومی ٹیم نے ہدف 7 وکٹوں کے نقصان پر پورا کر لیا، قومی ٹیم کی جانب سے عبداللہ شفیق بغیر کوئی رنز بنائے پویلین لوٹ گئے، بابر اعظم نے 23 رنز کی اننگز کھیلی، محمد رضوان ایک، کامران غلام 4، عرفان خان ایک، شاہین شاہ آفریدی بغیر کوئی رنز بنائے آؤٹ ہوئے۔

صائم ایوب نے ایک بار پھر عمدہ بیٹنگ کا مظاہرہ کرتے ہوئے 10 چوکوں اور 3 چھکوں کی مدد سے 109 رنز کی شاندار اننگز کھیلی، سلمان علی آغا نے ان کا بھرپور ساتھ دیتے ہوئے 82 رنز بنائے اور آؤٹ نہیں ہوئے۔

سلمان علی آغا کو آل راؤنڈر پرفارمنس کے باعث مین آف دی میچ قرار دیا گیا، سلمان علی آغا نے اپنا مین آف دی میچ ایوارڈ صائم ایوب کو دے دیا۔

کپتان محمد رضوان نے میچ کے اختتام پر گفتگو کرتے ہوئے کہا کہ صائم ایوب اور سلمان آغا نے اچھی اننگز کھیلی، کامیابی ٹیم ورک کا نتیجہ ہے۔

پاکستان کا اسکواڈ؛ کپتان محمد رضوان، صائم ایوب، عبداللہ شفیق، بابر اعظم، کامران غلام، سلمان علی آغا، محمد عرفان خان، شاہین شاہ آفریدی، نسیم شاہ، حارث رؤف، ابرار احمد

جنوبی افریقہ کا اسکواڈ؛ ٹونی ڈِی زورزی، رائن رِکلٹن، راسی وینڈر ڈوسن، ایڈن مارکرم، ٹرسٹن سٹبز، ہینرک کلاسین (وکٹ کیپر)، مارکو یانسین، اینڈل فلیوک وایو، کاگیسو رباڈا، اوٹنِیل بارٹ مین اور تبریز شمسی جنوبی افریقہ کی پلیئنگ الیون کا حصہ ہیں۔

یاد رہے کہ اس سے قبل دونوں ملکوں کی ٹیموں کے درمیان تین ٹی ٹوئنٹی میچز کی سیریز میزبان ٹیم نے دو صفر سے اپنے نام کرلی تھی جبکہ تیسرا ٹی ٹوئنٹی بارش کے باعث شروع ہی نہ ہوسکا تھا۔