SportsLink PK Latest Sports News in Urdu
پاکستان اور جنوبی افریقا کے مابین کھیلے جانے والے دوسرے ٹیسٹ میچ کا پہلا روز ختم ہو گیا، پروٹیز نے اپنی پہلی اننگز میں 4 وکٹوں کے نقصان پر 316 رنز بنالیے ہیں۔
کیپ ٹاؤن میں جاری ٹیسٹ میچ میں اوپنر ریان ریکلٹن 176 رنز پر ناٹ آؤٹ ہیں۔ آج آؤٹ ہونے والے آخری بیٹر کپتان ٹیمبا باووما تھے، جنہوں نے 106 رنز کی باری کھیلی، انہیں سلمان علی آغا نے رضوان کی مدد سے قابو کیا۔
جنوبی افریقی اوپنرز نے اچھا آغاز کیا اور پارٹنرشپ قائم کر کے اسکور 61 رنز تک پہنچایا، جس کے بعد خرم شہزاد نے ایڈن مارکرم کو 17 رنز پر آؤٹ کردیا۔
پہلی وکٹ گرنے کے بعد پاکستانی بولرز نے جنوبی افریقی بیٹرز کے گرد جیسے گھیرا تنگ کرنا شروع کردیا اور صرف مزید 11 رنز کے اضافے کے دوران 2 وکٹیں حاصل کرلیں۔
جنوبی افریقا کی دوسری وکٹ 70 اور تیسری وکٹ 72 رنز پر گری۔ویان ملڈر کو 5 رنز پر محمد عباس نے جبکہ ٹرسٹن اسٹبس کو صفر پر آغا سلمان نے آؤٹ کیا۔
بعدازاں پہلے دن کھانے کے وقفے پر جنوبی افریقہ نے پاکستان کے خلاف 3 وکٹ پر 72 رنز بنالیے۔
کیپ ٹاؤن ٹیسٹ کے لیے پاکستان ٹیم میں ایک تبدیلی کی گئی ہے، فاسٹ بولر نسیم شاہ کی جگہ میر حمزہ کو پلیئنگ الیون میں شامل کیا گیا ہے۔
پاکستان پلیئنگ الیون: کپتان شان مسعود، صائم ایوب، بابر اعظم، کامران غلام، سعود شکیل، محمد رضوان، سلمان آغا، عامر جمال، خرم شہزاد، محمد عباس، میر حمزہ
جنوبی افریقہ پلیئنگ الیون: ایڈن مارکرم، ریان ریکلٹن، ٹیمبا بوومالیڈ، ٹرسٹن اسٹبز، ویان ملڈر، ڈیوڈ بیڈنگھم، کائل ویرین، مارکو جینسن، کیشو مہاراج، کاگیسو ربادا، کیوانا مپھاکا
کیپ ٹاؤن میں پاکستان جنوبی افریقہ کے خلاف آج تک کوئی ٹیسٹ میچ نہیں جیت سکا ہے، پاکستانی ٹیم یہ ٹیسٹ میچ جیت کر سیریز برابر اور جیتنے کا ریکارڈ بھی قائم کر سکتی ہے۔
واضح رہے کہ میزبان ٹیم نے گرین شرٹس کو سنچورین میں کھیلے گئے پہلے ٹیسٹ میچ میں 2 وکٹوں سے شکست دی تھی۔ قبل ازیں، دونوں ٹیموں کے درمیان 3 ٹی20 اور 3 ون ڈے میچوں کی سیریز کھیلی جا چکی ہے۔
جنوبی افریقہ کی ٹیم نے 3 ٹی20 میچوں کی سیریز میں گرین شرٹس کو 0-2 سے شکست دی تھی جبکہ تیسرا اور آخری ٹی20 میچ بارش کی نذر ہوگیا تھا۔ پاکستان کی ٹیم نے 3 ون ڈے میچوں کی سیریز میں میزبان پروٹیز ٹیم کو 0-3 سے کلین سویپ کیا تھا۔
