ورلڈ ٹیسٹ چیمپئن شپ فائنل کے ٹکٹس کل سے فروخت کیلئے دستیاب
دبئی: آسٹریلیا اور جنوبی افریقا کے درمیان 11 سے 15 جون تک لارڈز میں شیڈول ورلڈ ٹیسٹ چیمپئن شپ فائنل کے ٹکٹوں کی فروخت کی تاریخ سامنے آگئی۔
دنیا بھر کے شائقین کرکٹ یہ دلچسپ مقابلے براہ راست گراؤنڈ میں جا کر دیکھ پائیں گے، اس مقصد کے لیے انہیں بے تابی سے ٹکٹوں کا انتظار ہے۔
آئی سی سی نے اعلان کیا ہے کہ شائقین اب 31 جنوری سے ٹکٹ حاصل کر پائیں گے، رجسٹرڈ شائقین کے لیے ٹکٹس کی ونڈو 29 جنوری سے کھل گئی ہے۔
یاد رہے کہ ورلڈ ٹیسٹ چیمپئن شپ کے پوائنٹس ٹیبل پر جنوبی افریقا 69.44 فیصد کے ساتھ پہلے جبکہ آسٹریلیا 63.73 فیصد کے ساتھ دوسرے نمبر پر موجود ہے۔
دسمبر 2024 تا جنوری 2025 کے دوران کھیلی گئی گواسگر بارڈر ٹرافی میں آسٹریلیا نے بھارت کو شکست دے کر ورلڈ ٹیسٹ چیمپئن شپ کے فائنل کے لیے کوالیفائی کیا تھا جبکہ جنوبی افریقا نے پاکستان کو ٹیسٹ میں شکست دے کر فائنل تک رسائی حاصل کی تھی۔
