پاکستان نے جنوبی افریقا کو شکست دیکر سہ ملکی سیریزکے فائنل کیلئے کوالیفائی کرلیا۔
سہ ملکی ون ڈے سیریز، کپتان محمد رضوان اور نائب کپتان سلمان علی آغا نے ناممکن کو ممکن کر دکھایا، پاکستان نے ڈو اینڈ ڈائی میچ میں جنوبی افریقہ کو 6 وکٹوں سے شکست دے دی۔
پاکستان نے 353 رنز کا ہدف 4 وکٹوں کے نقصان پر49 ویں اوور میں حاصل کیا،پاکستانی اننگز کی خاص بات کپتان محمد رضوان اور نائب کپتان سلمان آغا کی شاندار سنچریاں تھیں ،
کپتان محمد رضوان کی سنچری میں 7چوکے ،3 چھکے شامل تھے ، انہوں نے 106گیندوں پر سنچری مکمل کی،یہ محمد رضوان کی ون ڈے کیرئیر کی چوتھی سنچری ہے۔
نائب کپتان سلمان علی آغا نے 13 چوکوں کی مدد سے سنچری بنائی،انہوں نے87گیندوں پر سنچری اسکور کی،یہ سلمان علی آغا کی ون ڈے کیرئیر کی پہلی سنچری ہے،فخر زمان 41،بابراعظم 23اور سعود شکیل 15رنز بناکر آؤٹ ہوئے
قبل ازیں سہ فریقی سیریز کے اہم میچ میں جنوبی افریقا نے پاکستان کو جیت کیلئے 353 رنز کا ہدف دیا،کراچی میں کھیلے جارہے میچ کا ٹاس جنوبی افریقا نے جیتا اور پہلے بیٹنگ کرنے کا فیصلہ کیا، جنوبی افریقا کے بیٹرز نے پاکستانی بائولرز کی کھل کر دھلائی کی۔
جنوبی افریقا نے 5وکٹوں کے نقصان پر 352رنز بنائے،کلاسن 87رنز بناکر نمایاں رہے،میتھیو بریز نے 83اور ٹیمبا باووما نے 82 رنز کی اننگز کھیلی۔
شاہین شاہ آفریدی نے 2کھلاڑیوں کوآؤٹ کیا،نسیم شاہ اور خوشدل شاہ کے حصے میں ایک ایک وکٹ آئی ، جبکہ جنوبی افریقا کا ایک بیٹر رن آئوٹ ہوا۔
نائب کپتان سلمان علی آغا پلیئر آف دی میچ قرارپائے ،انہوں نے کہا کہ ہدف بڑا تھا مگر بہتر کھیل کی وجہ سے کامیابی ملی،کراچی کی پچ کا بھرپور فائدہ اٹھایا،خوشی ہے کہ پرفارمنس ٹیم کے کام آئی،جس پلان کے تحت بیٹنگ کی وہ کامیاب ہوا۔
ٹاس جیتنے کے بعد جنوبی افریقی کپتان ٹیمبا باووما نے گفتگو کرتے ہوئے کہا ہے کہ ٹیم میں 4 تبدیلیاں کی گئی ہیں، پہلے میچ میں شکست سے سیکھا ہے، نوجوان کھلاڑیوں کو موقع دیا تھا، آج بھرپور ٹیم کیساتھ میزبان پر اٹیک کریں گے، پچ بیٹنگ کیلئے ساز گار ہے۔
اس موقع پر قومی ٹیم کے کپتان محمد رضوان کا کہنا تھا کہ جنوبی افریقا کے خلاف سکواڈ میں 2 تبدیلیاں کی گئی ہیں، میچ میں کامیابی حاصل کرنے کی کوشش کریں گے تاکہ ٹورنامنٹ کے فائنل میں جگہ بنائیں، ہم ٹاس جیتتے تو پہلے بیٹنگ ہی کرتے۔
سہ ملکی سیریز کا فائنل جمعے کو پاکستان اور نیوزی لینڈ کے درمیان کراچی میں ہی کھیلا جائیگا۔
پاکستان کی پلیئنگ الیون ؛ محمد رضوان (کپتان)، فخر زمان، بابراعظم، سلمان آغا، سعود شکیل، طیب طاہر، خوشدل شاہ، شاہین شاہ آفریدی، نسیم شاہ، محمد حسنین اور ابرار احمد پاکستان کی پلیئنگ الیون میں شامل تھے۔
جنوبی افریقہ کی پلیئنگ الیون ؛ ٹمبا بووما (کپتان)، ٹونی دی زور زی، میتھیو بریٹزکی، کائل ویریئن، ہینرک کلاسن، ویان مولڈر، سینوران متھوسامی، کاربن بوش، کیشیو مہاراج، لنگی نگیڈی اور تبریز شمسی جنوبی افریقہ کی پلیئنگ الیون میں شامل تھے۔
