کراچی سمیت صوبہ بھر میں جاری پنک گیمز اختتام پذیر ہوگئے، کراچی سر فہرست رہا

کراچی سمیت صوبہ بھر میں جاری پنک گیمز اختتام پذیر ہوگئے،

فاتح ٹیموں میں ایوارڈ تقسیم، کراچی سر فہرست رہا

منفردایونٹ میں 30 اضلاع کی 6 ہزار سے زائد طالبات کھلاڑیوں نے حصہ لیا،

ڈسٹرکٹ ایسٹ کراچی کے پی ای ایس ایچ کالج 5 جنرل ٹرافیوں کے ساتھ سر فہرست

کراچی ( سپورٹس لنک رپورٹ) سندھ حکومت کے تحت کراچی سمیت صوبے بھر میں ہفتے سے جاری سندھ پنک گیمز رنگا رنگ اختتامی تقریب کیساتھ ختم ہو گئے۔

سندھ یوتھ کلب میں ہونے والی ہفتہ روزہ سندھ پنگ گیمز کی اختتامی تقریب میں مہمان خصوصی سیکریٹری کھیل عبدالعلیم لاشاری، ڈسٹرکٹ اسپورٹس افسر شرقی اسماعیل شاہ اور دیگر مہمانان نے بھر پور تعداد میں شرکت کی۔

سندھ پنک گیمز کا کراچی، حیدر آباد، سکھر، لاڑکانہ، میر پور خاص اور شہید بینظیر آباد ڈویژن کے 30 اضلاع میں انعقاد کیا گیا۔ کراچی ڈویژن کے ڈسٹرکٹ شرقی کے افسر اسماعیل شاہ کی سربراہی میں ہونے والی سندھ پنک گیمز میں جیتنے والی ٹیموں کو ٹرافی اور 400 سو طلبہ میں اسناد تقسیم کئے گئے،

جس میں پی ای سی ایچ کالج کے طلبہ نے ٹیبل ٹینس، تھر و بال ، کرکٹ اور بیڈمنٹن میں 5 ٹرافیوں کیساتھ پہلی پوزیشن حاصل کی۔

ترجمان محکمہ کھیل کے مطابق ڈسٹرکٹ سینٹرل کراچی میں کی اسپورٹس افسر حاجرا نواب کی سربراہی میں ہونے والی گیمز میں کرائیڈو کالج کی طلبہ کھلاڑیوں نے کرکٹ کا فائنل جیت کر ٹرافی اپنے نام کر لی۔

جبکہ ضلع جنوبی کراچی کے اسپورٹس افسر فرید علی کی سر براہی میں ہونے والی گیمز میں این جی وی اسکول نے کرکٹ اور فٹسال میں ونر کی ٹرافی جیت لی اور 300 طالبات کھلاڑیوں میں اسناد تقسیم کئے گئے۔

اس کے علاوہ ضلع کورنگی کے ڈسٹرکٹ اسپورٹس افسر شکیل احمد کی سربراہی میں ہونے والی پنک گیمز میں سعود آباد گرلز کالج کی گرلز نے فٹسال اور ٹیبل ٹینس میں ٹی ایم سی اسکول نے فائنل جیت کر ٹرافی اور 5 گولڈ مڈل اپنے نام کر لئے،

جبکہ ڈسٹرکٹ ویسٹ کراچی میں خواتین نے کرکٹ اور فٹسال کا میچ جیت کر فائنل کی جنرل ٹرافی اپنے نام کر لی۔ ترجمان کے مطابق ضلع ملیر کے علاقہ گڈاپ ٹان میں ڈسٹرکٹ اسپورٹس افسر سنی پرویز نے بھی سندھ پنک گیمز کا انعقاد کروایا جس میں 3 سو سے زائد لڑکیوں نے حصہ لیا

اور بیڈ منٹن ، فٹبال اور تھروبال میں ٹرافی اور گولڈ مڈلز اپنے نام کئے ۔ اس موقع ع پر اختتامی تقریب کے مہمان خصوصی سیکریٹری کھیل عبدالعلیم لاشاری نے ونر اور رنر اپ میں ٹرافیاں اور اسناد تقسیم کرتے ہوئے کہا کہ کراچی سمیت سندھ بھر میں 6 ہزار سے زائد کھلاڑیوں نے بھر پور شرکت کی،

جبکہ گیمز میں تلوار بازی ، تھر و بال ، کرکٹ ، بیڈمنٹن، باکسنگ اور ٹیبل ٹینس اور دیگر گیمز کے مقابلوں کا انعقاد کیا گیا۔ تمام گرلز کھلاڑی محکمہ کھیل کو ہر سال ایونٹ کرانے کیلئے زور دیں تا کہ ایسے ایونٹ ہر سال منعقد کریں۔

سیکریٹری کھیل کا کہنا تھا وزیر کھیل سردار محمد بخش مہر کی خواہش ہے کہ سب سے زیادہ لڑکیوں کو کھیلوں میں پروموٹ کیا جائے، محکمہ کھیل سندھ پنک گیمز ہر سال انعقاد کیا جائے گا ،

ہماری خواہش ہے کہ بچے گیمز میں ملک اور صوبے کا نام روشن کریں۔ بچوں کے والدین کا بھی شکرگزار ہوں جنہوں نے سب کو کھیلوں میں شرکت کیلئے اجازت دی۔