پہلی آل چترال دینی مدارس فٹبال ٹورنامنٹ کا شاندار اختتام، لاہور اے چیمپئن بن گیا
پشاور: طہماس خان فٹبال سٹیڈیم میں منعقدہ پہلی آل چترال دینی مدارس فٹبال ٹورنامنٹ اختتام پذیر ہوگیا، جس کے سنسنی خیز فائنل میں لاہور اے نے سخت مقابلے کے بعد پشاور گرین کو پنالٹی ککس پر شکست دے کر چیمپئن شپ اپنے نام کرلی۔
ٹورنامنٹ کی اختتامی تقریب میں ڈپٹی کمشنر کوہاٹ عبداللہ اکرم اور سینیٹر طلحہ محمود فاؤنڈیشن کے سعید احمد مہمانانِ خصوصی تھے، جبکہ صوبائی فٹبال ایسوسی ایشن کے ملک ہدایت الحق سمیت مختلف دینی مدارس کے علماء کرام اور طالب علموں نے بھی شرکت کی۔
اس شاندار ٹورنامنٹ میں پشاور، اسلام آباد، لاہور اور ملک کے دیگر شہروں میں موجود دینی مدارس کے چترالی علماء اور طلبہ نے بھرپور شرکت کی، جہاں نوجوان کھلاڑیوں نے اپنی فٹبال صلاحیتوں کا بھرپور مظاہرہ کیا۔
لاہور اے اور پشاور گرین نے شاندار کھیل پیش کرتے ہوئے سیمی فائنل مرحلہ عبور کیا اور فائنل میں جگہ بنائی۔ فائنل میچ میں دونوں ٹیموں نے عمدہ کارکردگی کا مظاہرہ کیا، تاہم مقررہ وقت تک کوئی بھی ٹیم گول نہ کر سکی،
جس کے بعد میچ کا فیصلہ پنالٹی ککس پر ہوا۔ لاہور اے نے پشاور گرین کو چار کے مقابلے میں پانچ گول سے شکست دے کر ٹورنامنٹ کی ٹرافی اپنے نام کر لی۔
تقریب سے خطاب کرتے ہوئے ڈپٹی کمشنر عبداللہ اکرم نے کہا کہ کھیل نوجوانوں کی جسمانی اور ذہنی نشوونما میں اہم کردار ادا کرتے ہیں۔ انہوں نے اس بات پر زور دیا کہ تعلیمی اداروں اور دیگر پلیٹ فارمز پر نوجوانوں کو کھیلوں جیسی صحت مند سرگرمیوں میں حصہ لینے کے مواقع فراہم کیے جانے چاہئیں۔
سینیٹر طلحہ محمود فاؤنڈیشن کے نمائندے سعید احمد نے اپنے خطاب میں کہا کہ ان کی فاؤنڈیشن تعلیم اور کھیلوں کے فروغ کے لیے مختلف اقدامات کر رہی ہے۔ انہوں نے اعلان کیا کہ چترال سمیت دیگر اضلاع میں بھی طلبہ کو اسکالرشپ کے ساتھ کھیلوں میں رہنمائی فراہم کی جائے گی۔
تقریب کے آخر میں مہمانانِ خصوصی نے بہترین کارکردگی دکھانے والے کھلاڑیوں اور فاتح ٹیم کے کپتان کو ٹرافی اور نقد انعامات سے نوازا۔ ٹورنامنٹ میں شریک کھلاڑیوں نے انتظامیہ کا شکریہ ادا کرتے ہوئے مستقبل میں ایسے مزید مقابلوں کے انعقاد کی امید ظاہر کی۔
ٹورنامنٹ کے ارگنائزرنے صوبائی وزیرکھیل سید فخرجہان کاشکریہ اداکیا کہ اس ٹورنامنٹ میں انکی بھرپورتعاون اور سرپرستی حاصل رہی ۔
جسکے باعث پشاورکےطہماس خان فٹبال سٹیڈیم میں منعقدہ پہلی آل چترال دینی مدارس فٹبال ٹورنامنٹ کے شاندار اختتام نے ثابت کیا کہ مدارس کے طلبہ بھی کھیلوں میں بھرپور مہارت رکھتے ہیں
اور اگر انہیں مواقع دیے جائیں تو وہ قومی اور بین الاقوامی سطح پر بھی نمایاں کامیابیاں حاصل کر سکتے ہیں۔
