پاکستان کی سب سے بڑی گھڑ دوڑ پاکستان ڈربی 2025 سردار نامی گھوڑے نے جیت لی
صدر مملکت نے ڈربی ریس جیتنے والے گھڑ سوار کو ٹرافی دی
صدر مملکت آصف علی زرداری کی پاکستان ڈربی ریس 2025 کی اختتامی تقریب میں شرکت
چیرمین سینیٹ سید یوسف رضا گیلانی نے لاہور ریس کورس کلب آمد پر صدر مملکت کا استقبال کیا
صدر مملکت نے لاہور ریس کورس میں ہونے والی ڈربی ریس کا مشاہدہ کیا
صدر مملکت نے ڈربی ریس جیتنے والے گھڑ سوار کو ٹرافی پیش کی
پاکستان کی سب سے بڑی گھڑ دوڑ پاکستان ڈربی 2025 سردار نامی گھوڑے نے جیت لی۔ گھڑ دوڑ پاکستان ڈربی کے مہمان خصوصی صدر آصف علی زرداری تھے جو ہیلی کاپٹر پر لاہور ریس کلب پہنچے۔
پاکستان ڈربی ڈے ریس کے سلسلے میں لاہور ریس کلب میں سنسنی خیز مقابلے ہوئے اور سرپٹ دوڑتے گھوڑے ایک دوسرے سے سبقت حاصل کرنے کی کوشش کرتے رہے۔
2400 میٹر طویل پاکستان ڈربی میں 15 شہہ سواروں میں مقابلہ تھا، ریس کے دوران چار شہہ سوار گھوڑوں سے گرے اور اذان نامی شہہ سوار شدید زخمی ہوا تاہم ریس جاری رہی اور سردار نامی گھوڑے نے میدان مار لیا،
فاتح سردار ٹرافی کے ساتھ 64 لاکھ روپے کی انعامی رقم کا حقدار قرار پایا۔
پاکستان ڈربی ڈے کی دیگر ریسز میں وار کمانڈ، زوزا، مونی پرنس، ویسٹرن لیڈی، پرنسسز نور اور سٹیٹس مین نے کامیابی حاصل کی جبکہ پریذیڈنٹ بریڈرز پاکستان کپ پرفیکٹ آگین نے جیتا۔
صدر مملکت آصف علی زرداری نے کامیاب گھڑ سواروں میں انعامات تقسیم کیے۔
