مجھے حارث، شاہین اور نسیم دو، میں انہیں میگا اسٹار بنا دوں گا: شعیب اختر
اسلام آباد: قومی کرکٹ ٹیم کے سابق فاسٹ بالر شعیب اختر نے کہا ہے کہ حارث رؤف، شاہین اور نسیم شاہ مجھے دے دیئے جاتے تو ان کو میگا سٹار بنا دیتا۔
اسلام آباد میں کیپٹل پریمیئر لیگ (سی پی ایل) پر دستخط کی تقریب سے خطاب کرتے ہوئے، جہاں وہ مہمان خصوصی اور برانڈ ایمبیسیڈر تھے، شعیب اختر نے قومی ٹیم کی سلیکشن پالیسیوں پر تنقید کی۔
انہوں نے کہا کہ مجھے سمجھ نہیں آتی کہ کھلاڑیوں کو کیوں ڈراپ کیا جاتا ہے اور پھر واپس لایا جاتا ہے۔ اگر میرے پاس بابر اعظم، شاہین آفریدی، حارث رؤف اور نسیم شاہ جیسے کھلاڑی ہوتے تو وہ اب تک میگا اسٹار بن چکے ہوتے۔
چیمپیئنز ٹرافی میں پاکستان کی کارکردگی پر مایوسی کا اظہار کرتے ہوئے شعیب اختر نے کرکٹ کی حالت کا موازنہ ملک میں ہاکی کے زوال سے کیا۔ انہوں نے کہا کہ انتظامیہ اور ٹیم میں بار بار تبدیلیاں نتائج نہیں دے رہی ہیں۔
پی سی بی کے چیئرمین محسن نقوی کی انفراسٹرکچر کو بہتر بنانے کی کوششوں کا اعتراف کرتے ہوئے شعیب اختر نے پالیسی اصلاحات کی ضرورت پر زور دیا۔ انہوں نے مزید کہا، ’’نقوی کرکٹ کی بہتری کے لیے کام کرنا چاہتے ہیں، لیکن انھیں اپنے اہم فیصلہ سازوں کو بھی تبدیل کرنے کی ضرورت ہے۔‘‘
سابق فاسٹ بولر نے پلیئر کے ورک لوڈ مینجمنٹ کی اہمیت کو دہراتے ہوئے اصرار کیا کہ شاہین، حارث اور نسیم کو ان کی کارکردگی اور فٹنس برقرار رکھنے کے لیے آرام دیا جانا چاہیے۔
