پنجاب سپورٹس بورڈ ملازمین کا تنخواہوں کی عدم ادائیگی کیخلاف احتجاج
لاہور(سپورٹس لنک)
سپورٹس بورڈ پنجاب کے ملازمین تنخواہوں اور واجبات کی عدم ادائیگی کے خلاف سراپا احتجاج بن گئے ۔ سپورٹس بورڈ پنجاب کے ملازمین نے نیشنل ہاکی سٹیڈیم لاہور میں اپنے دفاتر کے باہر تنخواہوں اور واجبات کی عدم ادائیگی کے خلاف مظاہرہ کیا اور نعرے بازی کی۔
ملازمین نے بینرز اٹھا کر مطالبہ کیا کہ تنخواہوں اور واجبات کی جلد از جلد ادائیگی کی جائے ،احتجاج کرنیوالے ملازمین نے ڈیلی ویجز ملازمین کو مستقل اور کم از کم اجرت کے مطابق تنخواہوں کی ادائیگی کا مطالبہ کیا۔
اطلاعات کے مطابق مستقل ملازمین کو دو ماہ سے تنخواہیں نہیں ملیں جبکہ پرمننٹ ورک مین، ڈیلی ویجز ملازمین، پیکجز ملازمین اور ٹل فردر آرڈر ملازمین تنخواہوں سے محروم ہیں،
ملازمین کو 2 سے 8 ماہ تک کی تنخواہیں اور واجبات کی ادائیگی ہونا ہے ۔ یہ بھی معلوم ہواہے کہ ملازمین کو کم از کم اجرت 37 ہزار مقرر کرنے کے بجائے 32 ہزار روپے مل رہے ہیں۔
