طلحہٰ وحید کا سب سے زیادہ کامیاب ٹینس سروسز کا عالمی ریکارڈ
پاکستان کے سینئر ٹینس کھلاڑی طلحہٰ وحید نے سب سے زیادہ کامیاب ٹینس سروسز کا عالمی ریکارڈ اپنے نام کر لیا۔
گینز ورلڈ ریکارڈ کے مطابق پاکستانی ٹینس کھلاڑی نے 1 منٹ میں 59 کامیاب ٹینس سروسز کروا کر تاریخ رقم کر دی، وہ مذکورہ ریکارڈ قائم کرنے والے پہلے پاکستانی کھلاڑی ہیں۔
اس سے قبل یہ ریکارڈ امریکی کھلاڑی جان پیری کے پاس تھا، جنہوں نے 2019ء میں 1 منٹ میں 42 کامیاب ٹینس سروسز کی تھیں۔
طلحہٰ وحید کا نے 35+، 40+ اور 45+ ڈبلز کیٹیگریز میں کئی قومی ٹائٹل جیتے ہیں اور بین الاقوامی سطح پر پاکستان کی نمائندگی بھی کی ہے ۔
واضح رہے کہ طلحہٰ وحید نے مذکورہ ریکارڈ قائم کرنے کیلئے 3 ماہ کی سخت تربیت حاصل کی۔ انہوں نے یہ ریکارڈ 8 نومبر 2024ء کو لاہور میں قائم کیا تھا تاہم گینیز ورلڈ ریکارڈ نے 10 مارچ 2025ء کو باضابطہ طور پر ان کی کامیابی کو تسلیم کیا ہے ۔
صدر پاکستان ٹینس فیڈریشن (پی ٹی ایف) اعصام الحق قریشی، سیکرٹری جنرل کرنل ضیاء الدین طفیل سمیت دیگر عہدیداران اور ساتھی کھلاڑیوں نے اس کامیابی کو پاکستان ٹینس کے لیے ایک اہم سنگِ میل قرار دیا ہے ۔
