سیریز ہارے ہیں، کسی ٹورنامنٹ سے آؤٹ نہیں ہوئے: اظہر محمود
آکلینڈ: پاکستان کرکٹ ٹیم کے باؤلنگ کوچ اظہر محمود نے کہا ہے کہ فاسٹ باؤلرز کی کارکردگی انفرادی ہو رہی ہے بحیثیت باؤلنگ یونٹ نہیں ہو رہی، سیریز ہارے ہیں، کسی ٹورنامنٹ سے آؤٹ نہیں ہوئے۔
اپنے ایک بیان میں انہوں نے کہا کہ ایک باؤلر اچھی باؤلنگ کرتا ہے تو دوسرا اس طرح پرفارمنس نہیں دیتا، تین کے تین باؤلرز ایک ساتھ پرفارم کریں تو اچھا ہو گا۔
باؤلنگ کوچ کا کہنا تھا کہ ایک میچ میں حارث نے بہت اچھی باؤلنگ کی، باقی نہیں کرسکے، نوجوانوں پرمشتمل ٹیم ہے، کھلاڑیوں کی انجری اور فائٹ سپرٹ سب نے دیکھ لی، سیریز ہار گئے ہیں کسی ٹورنامنٹ سے آؤٹ نہیں ہوئے، ماڈرن ڈے کرکٹ میں اب 160 سکور نہیں ہوتا، 180 یا 200 پلس ہی ہوتا ہے۔
اظہر محمود کا کہنا تھا کہ شاہین آفریدی بدقسمت رہے ان کی گیند پر ٹاپ ایج ہوئے لیکن وکٹ نہیں ملی، نیوزی لینڈ آئے تو بہت چیلنجز کا سامنا تھا، کوشش ہو گی سیریز 3-2 کر کے جائیں ، بیٹرز کو باؤنس اور پیس کا سامنا تھا، ماضی کی نسبت اب زیادہ باؤنس ہوتی ہے۔
باؤلنگ کوچ کا یہ بھی کہنا تھا کہ بیٹر کو بتایا کہ پیس کے ساتھ لڑنا نہیں ہے اس کو استعمال صحیح کرنا ہے، باؤلرز کو بھی بتایا کہ یہاں اس طرح کی لینتھ رکھنی ہے ابرار کو آٹھ میچز ملے ہیں جو زیادہ نہیں ہیں۔
