پی ایس ایل x ; رسل ڈومینگو لاہور قلندرز کے کوچ مقرر
رسل ڈومینگو ایچ بی ایل پی ایس ایل 10 کے لیے لاہور قلندرز کے ہیڈ کوچ مقرر
لاہور، 29 مارچ 2025: لاہور قلندرز کو یہ اعلان کرتے ہوئے خوشی ہو رہی ہے کہ معروف جنوبی افریقی کوچ رسل ڈومینگو کو ایچ بی ایل پاکستان سپر لیگ 10 کے لیے ٹیم کا نیا ہیڈ کوچ مقرر کیا گیا ہے۔ وہ ڈیرن گف کی جگہ لیں گے جنہوں نے ناگزیر ذاتی وجوہات کی بنا پر دستیابی سے معذرت کر لی تھی
رسل ڈومینگو ایک انتہائی تجربہ کار کوچ ہیں جو اس سے قبل جنوبی افریقہ اور بنگلہ دیش کی قومی کرکٹ ٹیموں کے ہیڈ کوچ کے طور پر خدمات انجام دے چکے ہیں۔
وہ اپنی شاندار حکمت عملی اور نوجوان کھلاڑیوں کو نکھارنے کی صلاحیت کے لیے جانے جاتے ہیں۔ ان کی تقرری لاہور قلندرز کے ویژن سے مکمل طور پر ہم آہنگ ہےجو ایک مضبوط اور مسابقتی اسکواڈ بنانے پر مرکوز ہے۔
رسل ڈومینگو نے کہا:
"میں لاہور قلندرز کے ساتھ 2025 کے پی ایس ایل سیزن کا حصہ بننے پر بے حد پرجوش ہوں۔ میں جلد از جلد کام شروع کرنے، کھلاڑیوں اور مینجمنٹ سے ملنے اور ایک شاندار سیزن کے لیے تیاریوں کا آغاز کرنے کا منتظر ہوں۔ ہمیں اپنے پرجوش مداحوں کی بھرپور اسپورٹ حاصل ہوگی اور میں سب کے فخر کے لیے پوری محنت کروں گا۔”
لاہور قلندرز کے سی او او، ثمین رانا نے کہا:
"ہمیں خوشی ہے کہ رسل ڈومینگو پی ایس ایل 10 کے لیے ہمارے ہیڈ کوچ کے طور پر قلندرز فیملی میں شامل ہو رہے ہیں۔ ان کا بین الاقوامی سطح پر وسیع تجربہ، حکمت عملی کی مہارت اور کھلاڑیوں کو نکھارنے کی صلاحیت انہیں لاہور قلندرز کے لیے ایک قیمتی اثاثہ بناتی ہے۔ ہمیں یقین ہے کہ ان کی قیادت ٹیم کی کامیابی میں اہم کردار ادا کرے گی اور ہم ان کے ساتھ ایک شاندار سیزن کے منتظر ہیں۔”
ایچ بی ایل پاکستان سپر لیگ کی سب سے مقبول فرنچائزلاہور قلندرز، اپنا سفر 11 اپریل کو راولپنڈی کرکٹ اسٹیڈیم میں اسلام آباد یونائیٹڈ کے خلاف ایک اہم میچ سے شروع کرے گی۔ 2022 اور 2023 میں مسلسل دو ٹائٹل جیتنے کے بعد قلندرز اپنی برتری برقرار رکھتے ہوئے تیسری تاریخی کامیابی کے لیے میدان میں اتریں گے۔
شاہین شاہ آفریدی کی قیادت، متوازن اسکواڈ، اور پرجوش مداحوں کی حمایت کے ساتھ، قلندرز اپنی مہم کا کامیاب آغاز کرنے کے لیے پرعزم ہیں۔
