ٹیم ورک کا مظاہرہ کرنے والے کھلاڑی ناکام نہیں ہوتے: محسن نقوی
لاہور: چیئرمین پاکستان کرکٹ بورڈ (پی سی بی) محسن نقوی نے کہا ہے کہ میدان میں ٹیم ورک کا مظاہرہ کرنے والے کھلاڑی ناکام نہیں ہوتے۔
لاہور میں چیئرمین پی سی بی نے آئی سی سی ورلڈ کپ کوالیفائر کیلئے تیاری کرنے والی پاکستان ویمن ٹیم کے کیمپ کا دورہ کیا، اس موقع پر محسن نقوی نے کھلاڑیوں کی تیاریوں کے حوالے سے اپ ڈیٹس لیں اور خواتین کھلاڑیوں کا پریکٹس سیشن دیکھا۔
انہوں نے تربیتی کیمپ میں پلیئرز سے ملاقات بھی کی، کھلاڑیوں سے ملاقات کر کے ان کا حوصلہ بڑھایا اور کوالیفائر کے لئے نیک تمناؤں کا اظہار کیا جبکہ کوچز سے کھلاڑیوں بارے فیڈ بیک لیا۔
اس موقع پر کھلاڑیوں سے گفتگو کرتے ہوئے چیئرمین پی سی بی محسن نقوی نے کہا ہے کہ امید ہے کہ آپ بہتر کھیل کا مظاہرہ کریں گی، کوالیفائر میں فائٹنگ سپرٹ کے ساتھ کھیلیں گی۔
دریں اثنا ہیڈ کوچ محمد وسیم کی نگرانی میں کھلاڑیوں نے رننگ، باؤلنگ اور بیٹنگ کی بھرپور مشقیں کیں، کوچز نے کھلاڑیوں کو بائولنگ کی ٹپس دیں۔ ہیڈ کوچ محمد وسیم کا کہنا تھا کہ ورلڈ کپ کوالیفائر کے لئے تیار ہیں، ویسٹ انڈیز اور بنگلا دیش مشکل حریف ہو سکتے ہیں۔
واضح رہے کہ ویمنز کیمپ کا دوسرا مرحلہ 30 مارچ کو ختم ہو گا، خواتین کھلاڑی عید الفطرکی چھٹیوں کے بعد ورلڈ کپ کوالیفائر کے لئے دوبارہ لاہور میں جمع ہوں گی۔
