سیٹی بج گئی، میدان سج گیا، پی ایس ایل x کا رنگا رنگ تقریب کیساتھ آج سے آغاز
افتتاحی میچ میں آج لاہور قلندرز اور اسلام آباد یونائیٹڈ کے درمیان جوڑ پڑے گا۔
پی ایس ایل سیزن 10 کا بگل بجنے کو تیار ہے،
شام 7 بجے راولپنڈی کرکٹ سٹیڈیم میں رنگا رنگ افتتاحی تقریب سجے گی جس میں آتش بازی کا بھی مظاہرہ ہو گا، تقریب میں معروف گلوکارہ عابدہ پروین، علی ظفر، نتاشہ بیگ اور دیگر آواز کا جادو جگائیں گے۔
انتظار کی گھڑیاں ختم ہوگئیں ،دنیائے کرکٹ کے ستاروں سے سجی ایچ بی ایل پی ایس ایل 10میں چوکوں چھکوں کی بہارآج سے پنڈی سٹیڈیم میں شروع ہوگی ۔۔
افتتاحی تقریب شام 7بجے ہوگی ، جس میں معروف گلوکار اپنی فارمنس کا جادو جگائیں گے ۔افتتاحی میچ رات ساڑھے 8بجے دفاعی چیمپئن اسلام آباد یونائیٹڈ اور لاہور قلندرز کے درمیان راولپنڈی سٹیڈیم میں شروع ہوگا ،
پی ایس ایل میں شامل 6 ٹیموں کے کپتانوں نے جیت کاعزم لئے اسلام آباد میں پری ٹورنامنٹ مشترکہ پریس کانفرنس کی ،دفاعی چیمپئن اسلام آباد یونائیٹڈ کے کپتان شاداب خان نے کہا شائقین کے سامنے اچھی کارکردگی دکھانے کیلئے پرجوش ہیں۔
ملتان سلطانز کے کپتان محمد رضوان نے کہاکہ پی ایس ایل ایک بہت بڑا برانڈ بن چکی ہے کہ ملک کے ہر خاندان میں مختلف ٹیموں کے سپورٹرز ہیں جبکہ تمام شائقین اس لیگ کا پورا سال انتظار کرتے ہیں۔
جو بھی ٹورنامنٹ جیتے گا وہ اس ملک کیلئے کامیاب ہوگا۔شائقین نے جیسی امید کی ویسا پاکستان ٹیم نے پرفارم نہیں کیا۔ اگر ہمارے نتائج درست نہیں آتے تو تنقید کرنا ان کا حق ہے ۔ ماضی کی کارکردگی محض ماضی ہے ،
کارکردگی اچھی ہو یا بری، ماضی یاد نہیں رکھتا،کوئٹہ گلیڈی ایٹرز کے کپتان سعود شکیل نے کہاکہ گزشتہ چند سیزن کوئٹہ کیلئے اچھے نہیں رہے اور دیگر تمام ٹیموں کی طرح ہم نے بھی معیاری سکواڈ کو جمع کرنے کی پوری کوشش کی ہے ۔
ہم اس بار اچھا کھیلنے اور شائقین کی تفریح کے لیے پر امید ہیں۔لاہور قلندرز کے کپتان شاہین شاہ آفریدی نے کہاکہ پی ایس ایل میں لاہور قلندرز کا ایک اہم مقصد معیاری کھلاڑیوں کی تیاری اور انہیں سامنے لانا رہا ہے اور ہم لیگ کے 10ویں ایڈیشن میں بھی اس مقصد پر قائم رہیں گے ۔ امید ہے کہ ہماری ٹیم اس سیزن میں اچھی کارکردگی کا مظاہرہ کرے گی۔
پشاور زلمی کے کپتان بابراعظم نے کہاکہ اس سیزن میں ہم اس بات پر توجہ مرکوز کر رہے ہیں کہ ہم نے پچھلے دو ایڈیشنز میں کیا کھویا اور انہی غلطیوں کو نہ دہرایا جائے ۔ ہم نے بولنگ اور بیٹنگ دونوں شعبوں میں اپنا مرکز مضبوط کیا ہے تاکہ ہم کھیل کے کسی بھی مرحلے پر جدوجہد نہ کریں۔
کراچی کنگز کے نائب کپتان حسن علی نے کہاکہ کہ کراچی کنگز نے اپنی بیٹنگ میں فائر پاور لانے کے لیے اپنا کمبینیشن تبدیل کیا ہے اور ہم ابتدا ہی سے جارحانہ انداز میں کھیلنے کا ارادہ رکھتے ہیں کیونکہ پاور پلے آپ کے جیتنے کے امکانات کو بڑھانے کی کلید ہے ۔
کمنٹری پینل میں بڑے ناموں کی انٹری ; پی ایس ایل 10 میں کرکٹ کی دنیا کے کئی بڑے نام کمنٹری میں نظر آئیں گے جن میں انگلینڈ کے سابق کپتان سر الیسٹر کک اور ایم سی سی کے سابق صدر مارک نکولس کے نام قابل ذکر ہیں۔
پی ایس ایل میں شائقین کی دلچسپی کیلئے مختلف اقدامات کیے گئے ہیں جن میں پہلی مرتبہ ہر میچ میں مکمل اردو کمنٹری، میچوں کے دوران ریفل ٹکٹ کے ذریعے انعامات اور نئی جدت کے ساتھ پلیئر ٹریکنگ ٹیکنالوجی کا متعارف کرایا جانا شامل ہے۔
جدید ٹیکنالوجی کے ساتھ کوریج ; ناظرین اس پی ایس ایل میں 32 کیمروں اور جدید ٹیکنالوجی کے ساتھ کوریج کے اعلیٰ معیار سے لطف اندوز ہوسکیں گے اور یہ ایونٹ مختلف چینلز اور ڈیجیٹل پلیٹ فارمز کے ذریعے دنیا بھر میں دیکھا جا سکے گا۔
ایونٹ کے افتتاحی میچ میں دفاعی چیمپئن اسلام آباد یونائیٹڈ اور لاہورقلندرز ٹکرائیں گے، دونوں ٹیموں کے درمیان میچ رات ساڑھے 8 بجے راولپنڈی کرکٹ سٹیڈیم میں شروع ہو گا۔
لاہور قلندرز کے کپتان شاہین شاہ آفریدی نے اس حوالے سے کہا ہے کہ ہار اور جیت کھیل کا حصہ ہے، ہم نے یہ دیکھنا ہے کہ پاکستان کو نیا ٹیلنٹ کیسے دینا ہے۔
