سابق انگلش فاسٹ باولر جیمز اینڈرسن کو ’سر‘ کا خطاب مل گیا
انگلینڈ کے سابق فاسٹ باولر جیمز اینڈرسن کو سابق وزیراعظم رشی سوناک کی ریزگنیشن آنرز لسٹ میں نائٹ ہُڈ سے نوازا گیا ہے۔
42 سالہ جیمز اینڈرسن نے جولائی 2024 میں ٹیسٹ کرکٹ سے ریٹائرمنٹ لی تھی اور وہ 704 وکٹوں کے ساتھ ٹیسٹ کرکٹ کی تاریخ کے سب سے کامیاب فاسٹ باولر ہیں۔
ان سے زیادہ وکٹیں صرف سپنرز مرلی دھرن (800) اور شین وارن (708) نے حاصل کی ہیں۔ انگلینڈ اینڈ ویلز کرکٹ بورڈ کے چیئرمین رچرڈ تھامپسن نے کے کہنا ہے کہ ’سر جمی اینڈرسن کو بہت بہت مبارک ہو۔
یہ اعزاز ایک انگلش لیجنڈ کے لیے بالکل بجا ہے۔ ان کی مہارت، عزم اور اسپورٹس مین اسپرٹ نے انگلینڈ سمیت دنیا بھر کے کرکٹرز اور شائقین کو متاثر کیا۔
انگلینڈ کرکٹر بورڈ کے ایک اکاؤنٹ پر جیمز اینڈرسن کو مبارک باد دیتے ہوئے پوسٹ کیا گیا ہے کہ ’سر جمی اینڈرسن آپ پر جچتا ہے‘، سابق انگلش فاسٹ بولر جیمز اینڈرسن کو ’سر‘ کا خطاب مل گیا۔
غیر ملکی خبررساں ایجنسی کے مطابق ریزگنیشن آنرز لسٹ برطانیہ میں ایک روایت ہے جس کے تحت سبکدوش ہونے والے وزرائے اعظم مختلف افراد کو اعزازات کے لیے نامزد کرتے ہیں۔
جیمز اینڈرسن نے دسمبر 2002 میں آسٹریلیا کے خلاف ون ڈے ڈیبیو کیا تھا جبکہ ٹیسٹ کریئر کا آغاز مئی 2003 میں کیا تھا۔ انہوں نے اپنے بین الاقوامی کریئر میں 188 ٹیسٹ اور 194 ون ڈے میچز کھیلے۔
